منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

كنت دري صغير
فرحان بصغري
اداوني اهلي واحبابي
عند راجل كبير
دايرين بيه شلا دراري
قد عمري
عندو لحية طويلة
كيف الشيطان
مربع على كرسي عالي
كيف الضربان
على راسو داير رزة
بحال شلا عربان
عندو عصا من الزيتون
طويييييييييييلة
راسها مسنون
على حصير بالي
بركوني
تمة بقيت لحالي
بعدما تركوني
قال ليه الوالد:
شوف يا لفقيه
هذا ولدي ماجد
نترجاك لا تحن فيه
ومن العصا
ما تشفق عليه
ويلا غوت
ماتسمع ليه
انت اذبح
وانا نسلخ
اعطي لباباه لعصا
حتى يتملخ
ونسى الوالد مسكين
أن لالة لعصا
يمكن تكلخ
ويمكن تعطب
اللي مسكين عظمو رطب
وهنا تذكرت
بوجميع الغيواني
اللي قال من زمان
كلام ليه شلا امعاني:
قلبي جا بين
يدين الحداد
الحداد مايحن
مايشفق عليه
ينزل الضربة
على الضربة
ويلا برد
زاد النار عليه
الله يرحم عليها بوجميع
هكذا حفظنا القرآن
من غير فهامة أو تمعان
غير بالسليخ والضرب
والعضان
كان لفقيه مرة مرة
يخشي عينيه فجلودهم
وينام
واحنا نتلفوا فليام
نعاماس ليوم علينا غضبان
ما جبنا ليه غذا
خليناه جيعان
خرج من الحلقة
دار لينا الفلقة
وقال لينا :
العصا لمن يعصى
وفالعلقة بركة
وهكذا يا كرام
نعاماس خلا فينا شلا وشام
ما محاه زمان
مانسيناه مع ليام
لمسيد خلق جيل رعديد
ما يطالب بحق
ما يجيب تجديد
بقينا نشوفو بعويناتنا
خايفين على رجيلاتنا
وعصيدتنا بقات ديما باردة
وكلنا غاطسين فيها يدينا
وبقات الباردة ديما لينا
واللي فيها الصهد
نقولوا هاذي واعرة علينا
ويلا بغيتو الحقيقة
احنا خايفين غير على رجلينا
من ذيك لالة لعصا لحنينة
هكذا سماها فقيه الدرب لينا