منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

حلزونة حلزونة
مالك مقوقعة مخزونة؟
حلزونة حلزونة
مالك مغوبشة معفونة؟
حلزونة حلزونة
وليتي تايهة مجنونة
حلزونة حلزونة
آش درتي فهاذ الدنيا الملعونة؟
بنادم يطبخك حية فكسرونة
حلزونة حلزونة
خرجي وذيناتك
لا تبقايش ديما مخزونة
هزي لعلام بالعلالي
وانتفضي يا مجنونة
ما ياكلوش وليداتك
يا مدهونة
يكذبوا عليك
باش تبقاي ديما مدفونة
حيث لحمك هشيش
ياكلوا بنادم
سريط بلا نتيش
آش يخسر عليك
فِليل !
يجبد بيه احنيش
يبلعوا بلا نتيش
يحيد بيه الهويش
حاولي شي نهار
ياحلزونة
تخرجي من القوقعة الملعونة
وديري ليك خرجة معلومة
ديري مع الحلزون سرسوب
من حومة لحومة
بين درب ودرب ودروب
وخرجي وذيناتك
لا تقولي هذا عار أو حشومة
ناس العز معاك ديما مهمومة
ترق لحالك واحوال قرانك المضيومة
الوقت حان
خُرجي خُرجي
وعلى ذوك الدروج
دُرجي دُرجي
ولا تبقاي ديما مسجونة
العز كيتنزع ما يتعطى
را لمكسي بديال الناس
ما يتغطى
العز العز العز
ماكاين غير العز
يا ذيك الحلزونة المسجونة