الرجله - منتديات الأستاذ التعليمية التربوية المغربية : فريق واحد لتعليم رائد

2012-03-02, 20:59

رقم المشاركة : 1

tagnaouite

أستـــــاذ(ة) مــــاسي

إحصائية العضو

tagnaouite غير متواجد حالياً

الرجله

زجل

الرجله

سمعو يا ناس على مضرب مثال الرجله

كون مقدام لا يكون عندك قلب كفالحجله

لا تخاف غير من خلقك وزرع فيك الروح

وحدو سبحانو القوي يعلم سر لمجروح

كان حتى كان حطاب يحطب فشي غابه

خاليه غير لشجار وطيور بشكل عجابه

من خير لغابه يحطب ولحطبها بايع

لكن لحطب ملي كثرو حطابو، ضايع

قلال لحطب فذيك الغابه المرزوقه

وضاقت لرزاق بسبايب محروقه

وكان حذا هاذ الغابه اللي ضاعت

غابه كبيره ، شجرها غصانو ذاعت

هاذ الغابه ما يزعمو عليها حطابه

حيت عمرات بسبوعا واعره نهابه

كيف يصير لحال ، ويقرب ليها حطاب

بلا ملاغه يكون غذا ساهل بلا طياب

قالوا زمان ما يظفر بها غير زعيم

يزعم بشجاعة ، يصير بها كريم

هاذا ما فعل ذاك الحطاب وزعم

تشجع برجله كبيره وصبح ينعم

صار وحدو فلغابه يقطع لشجار

بزعامه كبيره فوضوح لنهار

خوتو لحطابه ما زعمو و خافو

ركباتهم الخلعه قبل ما يشوفو

وملي بدا الحطاب يحطب بالشاقور

وقف عليه سبع بصواتو مشخور

لحطاب عرف بلي ما كاين هروب

وراه صار زرده لسبع قبل لغروب

عرف راسو بلي راه قدام الموت

بحال سيدنا يونس قدام فم الحوت

تسمر الحطاب فمكانو تسميره

ولبس ثوب الثباته بكل تشميره

شاف السبع فعل الحطاب وتعجب

وظل محنزز حتى فاتو لعجب

ساعتها قال للحطاب بالتعجاب

عرفت علاش ما مزقت لثياب ؟

وما بين ترعاد وخوف التسليم

بقى الحطاب متشبت بالتزعيم

قال السبع : شفت فيك عرق الترجال

وبانت عليك علايم شجاعة الرجال

ما عندي ما نسالك فيك زغبة السبوعا

ظاهره عليك فجبين واضحه مطبوعا

من هاذ الساعه حطب ، ما يوصلك واصل

واللي وصلك كن محقق بلي يكون واحل

دازت يام ولا حظوا لحطابه والناس

بلي الحطاب يدخل ويخرج بلا قياس

قالو جميع راه تهابو لسباع

هو شريف براكتو لها باع

صبحو يهديوه زرادي واذبيحه

وببراكة الرجله مرزاق بربيحه

يدخل للغابه متنزه بلا حطيب

ويخرج منها منعم بالترحيب

هكذا يا ناس مرزوق بالتخمه

من تشجع ولبس لباس الهمه

إبداع : محمد الزاكي - سلا

(Tagnaouite)