حديث البوهاله
اللي ما عرف الرجال خسرها
واللي ما عرف الورده يكسرها
واللي ما عرف الطير الحر يشويه
ومن يشرب مشروغ غيرو يزويه
والحولي المعلوم بالتبن ما مبيوع
يجي الريح يطير تبنو يصير موزوع
والحولي المبيوع ما بقات عليه هدرا
مشات عليه العين وطار كيف الغبرا
والمعزي ديما مربوط فلسواق
حيث مشطون بنقيز وزعاق
ويلا غرك سخين حال يبراير
شوف زغب المعز فيه طاير
ولا تكون مهبول تايق بجو التسبال
راه يلعب بيك البرد وبكل الهبال
ويلا كنت نحاس حر تلقى النقرا
ويلا كنت مخلوض تلقى قزادر مسمرا
كل حبة يجي ليها من يكيلها
والزريعة المسوسة ليها من يجملها
ويلا كنت فروج تبصر ببصر مزيان
يرجع ليك ذاك الشوف بلقط هنيان
أما الفروج لعور بعينو المقوسة
تصيد تصييدة بلقط حبوبو مسوسة
واغرس فالوقت كيف غرس الغارس
قبل ما يفوتك الفوت ويمشي مارس
ويلا كنت حازم صعيب كفالحديد
رخف شويا القنبة راه ما يدوم تشديد
ويلا كنت تشري ، اشري بمهاله
ولا تزرب واختار النهار بتسواله
راه مشرى الليل جهل وضلاله
يرجع ليك بلخطية ، فعيونك جلاله
ويلا بغيتي تاكل غنمي معفي
سول عل المركد والمرعى يكفي
ولايغرك نعومة جلود اللفاعي
كثير منهم يقيسوك باللساعي
ولا تغرك لسانهم بالرطوبية
قلال يدامهم مع الدخان كف الرية
هاذي مجارب ناس عاشوا بوهاله
تخيار لجدود تبقى فالدم سلاله
-بقلم - محمد الزاكي- سلا -tagnaouite