|
اليوم طارت معزة وتواطات الجبال اليوم طارت معزة وتواطات الجبال بنادم حايد الرزة ودار منها الحبال الحر غير بالغمزة خرج هايج كيف الجمال والعبد واخا بالدبزة خَرّج ذوك النبال يهتفوا بالنصر والعزة حتى تقاضى الدفال نوضوا ياناس حيدوا الرزة رابنادم عليكم عوال مانفعات فيكم غمزة ماهدَّاتكم جبال ديروا لينا شي ركزة حتى يغيروا منا الغوال وذبحوا لينا هاذ المعزة ولا تكثروا علينا السوال فرقوا بيناتنا ذيك الخبزة وقسموا بيننا الموال واش انتوما تديروا الرزة واحنا تقجونا بالحبال؟ واش انتوما تاكلوا المعزة واحنا شوفنا يحوال؟ واش انتوما ليكم العزة واحنا لينا لهوال؟ غزَّا فينا هاذ الزمان غزَّا احنا اللي ولّفنا لغلال خلينا ليهم الخبزة وفرطنا فالموال اليوم تطير المعزة و تواطا هاذ الجبال واللي ماحايد الرزة يمشي يشوي الكبال هاالدستور جاب العزة وفينكم ياصحاب المال؟!! نصوتوا بنعم غير بالغمزة ونحيدوا القيل والقال |
رد: اليوم طارت معزة وتواطات الجبال عمر المعزة ما تطير والجبال محال تواطى الدرويش فراشو الحصير ولباسو دربالة وشطاطة والغني عيشتو بالتبدير ملكو من ميسور لطاطة شارب الخمر ولابس الحرير يفشي بالفساد بالفرطة ناجح في الإنتخاب بالتزوير راشي بدرهم وكيلو بطاطة الدرويش عاق وطلب التغيير ما رضى بعيشت السلاطة القمع الظلم والنفاق والتجرير تدوي تلقى فوق ظهرك زرواطة ولي طالب بحقو بسلم وتيسير ردوه من القوم اللغاطة خلينا ليهم المال والفلوس والحرير وحنا لينا كرامتنا والبساطة المهم المعزة عمر بوها تطير والجبال شامخة ما تعرف الوطى وجاي نهار لي يتبدل فيه الكثير وتماك الأرض كاملة تولي وطى وساعتها يكون الحساب الكبير يومها ما ينفع جاه لا مال ولا سلطة |
رد: اليوم طارت معزة وتواطات الجبال اللهم أصلح أحوالنا في الأمور كلّها . شكرا لك أخي الكريم أبو العزّ . |
رد: اليوم طارت معزة وتواطات الجبال أبو العز وعلام القبيلة ثنائية أدبية منسجمة ومتكاملة يحق لمنتدى الاستاذ الافتخار بهذين الهرمين الكبيرين في جنس الزجل المغربي الأصيل لغة ومعنى دمتما أخين متألقين، متميزين ومتحابين. http://1.bp.blogspot.com/-Qj6LjPrTxB...1600/taksi.jpg |
رد: اليوم طارت معزة وتواطات الجبال عمر المعزة ما تطير غي الا بغينا نكذبه على راسنا ونطيروها ربي يصاوب الاحوال من عنده وقادر يهدي عباده اخي ابو العز واخي علام لقبيلة شكرا لهذا الإبداع المشبع بأعمق المعاني الهادفة تحياتى ومودتى |
| الساعة الآن 10:57 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd