|
واش العلام داز من هنا ولى غير تراقصوا عيني ؟؟؟ واش العلام داز من هنا ولى غير تراقصوا عيني واش العلام شفناه هنا ولى غير احوالوا عيني ++++ داز من هنا كيف الطيف راكب على عودو ويشالي قلنا جاي يدوز معانا الصيف يطرز لينا الكلام الغالي ++++ اللي شافو قال هذا العلام واللي ماشافو قال هذا غير كلام إيوا بان وعليك 66 أمان حايد علينا هاذ الغمام اللي ماجايب شتا جايب غير التخمام هز ذوك الكمام وآراك للتزمام بريشة أو قلام المهم كتب لينا الكلام ويكون من عند خونا العلام باش يطير الحمام ويعلي ويرقص فوق الغمام ويحضر العز ويطلع الميزان وتشعل المجامر ويعلى الدخان والناس تاكل الزنان ولجواد تشطح وتضحك بلا سنان والزحاف ينقز الحيطان والأعمى يخيط الكتان وامي عجوز تصيد السمان وترقص مع القومان والعلام يصول ويجول فالفدان يتبورد ويدردك ويكتب حريفات حنان سير يا العلام راك فنان http://i3.makcdn.com/userFiles/a/_/a...1159310514.jpg |
رد: واش العلام داز من هنا ولى غير تراقصوا عيني ؟؟؟ وا فينك يا خويا لعلام راح ابو العز يمكن منك زعفان حيت دزتي كي الريح وخليتيه حاير منك ومعذبه التخمام فينك يا خويا عافاك رجع ضغيا .. راه شهانا ابو العز باكل الزنان ريحته وصلان لنيوفنا عبقات المكان واهل الاستاد مضاو السنان ها العار يا لعلام سرج عودك وطلقه مع الريح يوصل ضغيا ومع الشعر الجميل ينوض ويطيح ايو ما عرفت كيف درت ليها هاد التخربيقة يا ابو العز هههه راه زعمتني والله يستر وخلاص والى ما عجبك كلامي ستر ما ستر الله هههه تحياتي لك ولطويراتك |
رد: واش العلام داز من هنا ولى غير تراقصوا عيني ؟؟؟ اقتباس:
الكلام الزين هو اللي كيخرج بلا تخمام يحلي العين ويزين المقام يشهي النفس ويعلي لعلام فينك يا الزنان ؟ فينك يا الدخان؟ بلا بيك يا علام ماكاين لا قوافي ولا زنان الله يحفظك لينا يا همس الروح حريفاتك راها تغني وتنوح بين شلا ناس املاح منهم العرب والشلوح العز بينهم فاح وغابت بينهم القروح مداد القلام ساح والحرف بينهم مشروح والبوم مابقى ينوح والقلب مابقى مجروح ماكاين غير العز يجي ويروح والزهر يلالي ويفوح الله يعطيك الرضا ياهمس الروح مودتي لك ستبقى تلوح |
رد: واش العلام داز من هنا ولى غير تراقصوا عيني ؟؟؟ أبيات جميلة أخي أبو العز نظمت هنا زجلية معطرة بأريج الاخوة الصادقة والمحبة الكبيرة لاخينا علام القبيلة بورك يراعك أخي ودمت للحرف العذب من الأوفياء أمتعتنا فعلا شكرا لك |
رد: واش العلام داز من هنا ولى غير تراقصوا عيني ؟؟؟ بصح العلاّم من هنا داز وهنا فين غا يحط الخيام واخة دار كيف داك الباز يطل ويتسل بلا تخمام ويعلّي وفي مخالبو هاز طيور من سمريس وحمام وانتما ماشي ناس التحراز حيت راكم خير ما في القوام طيوركم عز من كل العزاز راوية أجمل ما في الأنغام حرة غرة ما تقبل عيشة لقفاز تصول وتجول وتصل الأرحام غير اعذرني يا خليلي أبو العز الى قللت المجية وشديت القدام ماشي لخاطري غير قول بازّ الزمان غلبني وزادتني لسقام سلمت أمري وعطيت ظهري لتغراز بعلت ريقي وقطعت لكلام جنيت من النخلة حب الغاز وسمايا صباحها وليلها ظلام غير دعيو معايا بالشفاء يا العزاز علّ يجيب الله من دعاكم التمام ونوقف على رجلي نعطيها للتنقاز نبقى معاكم وحداكم حاط لخيام |
| الساعة الآن 21:31 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd