منتديات الأستاذ التعليمية التربوية المغربية : فريق واحد لتعليم رائد

فينا .. وفينا

شحال من عارف فخدمتو واحل

وشحال من جاهل بجتهتو كاسب گمرة

فينا اللي ما عندو فلوس وقانع بقليل النعمة

وفينا اللي كيف الطبل جوفو خاوي

وراسمالو غير الهضرة

وفينا اللي عايش بالصدق والنية الصافية

راسو شامخ وكلمتو ديما عالية

وفينا مول الجبروت والطغيان واليد الخْفية

فينا الضاحك والباكي

وفينا المهموم والمبرع شاكي

وفينا اللي ناقص دفا فنعاسو

وناقص قوت ومعلي راسو

حيت عزيز النفس

قدامو فالأرض ثابتة ومرصي ساسو

وفينا اللي يتباهى بجهدو

ما يفاجي هم، ما يرفع غمة

لسانو يقطع مثل السيف

ويدو تسلب حق الغير بلا رحمة

فينا العاقل مظهرو مبهدل وراضي بالقسمة

وفينا المنافق والكذاب

جلدو ديما مبدل وبلا حشمة

يا صاح! لا تلوم الدنيا على هاد الناس ..

الفاهمين فيها قلال

والجاهلين منهم شلا، وبلا قياس

مسبقين الرجلين، وديما ناسيين الراس

يا صاح! لا تلوم الدنيا على قلة لمان

ديما هي هكذا من قديم الزمان:

فيها اللي طالع للسحاب وناسي راسو

ديما مرفه، وما جايب للدنيا خبار

وفينا اللي ساكن في الحداري

ديما يغالب الزمان

على لقمة للدراري

وفينا اللي مريض بالكلام

ما يبالي بهم، وما ليه راحة

وفينا الساكت عينو فضاحة

ديما مشمر ع الكمام

وفينا الجيعان والمزلوط يتوجع

وفينا الشبعان بلا ماكلة يتگـرع

يا صاح! شوف الدنيا مثل الشمعة

ديما ضاوية لماعة..

تعطي لصاحب الطمع بلا قياس

وتغني مول القناعة

نوصيك وصية يا إنسان

الدنيا بحر ما فيه أمان

غرورها يفتن بكل الألوان

مهما تصول وتجول

وتعيا تفكر وتگـول

لازم الفلك يجري ويدور

حتى توقف الأرواح عند مولاها

ولجساد حين تكسى بغطاها

والنفس بحال اللي تثوب

بحال اللي تعصى مولاها

عند الله نصيبها يلقاها

لكن مولانا حنين قادر يحمينا

من شرور الدنيا والناس اللي تآذينا

سبحان ربنا الكريم يجود علينا

ويغفر ويتوب ويسمح لينا

عذبة كلام
03/01/2010