تفركت يا حفيد جدودي لخيار
و بغيت نكتب عليك قصيدة
تربيتي فالخيمة وكنتي ولد الدار
وعلاقتك بجدودي كانت وطيدة
كان صياحك مسموع ف الخلى والقفار
تفرح بيك الكاعة وتخاف منك الحصيدة
قدّروك الاسلاف ورفعو ليك الشان
كنتي تعلّق ف الحيوط كيف الخنجر
جهلوك الاخلاف ما بقيتي على طرف اللسان
جهلك الكبير والصغير ضاع شانك اليوم وتبعثر
كنّا وكنتو والله يرحمك يا فلان
هذا ما مكتوب عليك ف الحياة ومقدّر
تعزيتي في حياتك يا المنجل
حتى من البدوي اليوم نساك
ضاع شانك فزمان السرعة وتهجل
ودخلوك بزز منك ف سوق جواك
واخة حار ف جواك مول الفطنة والعقل
قّلّبوا على الغايب وانت يا مسكين نساوك

مشكور أخي ابو العز على ردك البهي المعتاد المنجل ما هو إلا معنى أما المقصود يا أخي شلى ناس قساو الباس باتو بلا نعاس بلعو الهوا ومضغوه بالضراس قساو المر على ود البلاد ما خلاو ما دارو وفالتالي مشات الصحة مع طحين الرحى تجلاو وفحياتهم تلغاو نساهم البادي والعادي و شكون بقى يشوف فيك يا من كنتي
خير ما خسرو عليهم اللي تفكروهم " كنا وكنتو صرنا وصرتو "
مودتي لك يا بو الحروف المرصعة

زمان كانت اعمال الواحد وفعالو تدخلو التاريخ من واسع الأبواب ،اليوم دخول التاريخ ولا صحّة وجبهة مايجي بحكمة مأثورة ولا أعمال بطولية .
العامر دخل جواه والخاوي نسمعوا لغيطو ...ها المناحة كبيرة والميت فار.
شكرا علام القبيلة،
تقبل تحيتي ومودتي.