طاحت البقرة كثروا الجناوة - منتديات الأستاذ التعليمية التربوية المغربية : فريق واحد لتعليم رائد

2010-05-25, 22:19

رقم المشاركة : 1

ابو العز

نائب مدير الأفكار والمشاريع الأستاذية

إحصائية العضو

ابو العز غير متواجد حالياً

طاحت البقرة كثروا الجناوة

ليوم طاحت البقرة
كثروا لمواس
شي باغي لحم الراس
يبخروا فالكسكاس
شي باغي الهبرة
يديرها قضبان
يزيدها شحيمة
يكثر الدخان
شي باغي يدير القديد
يكسكس عليه نهار العيد
تشم ريحتو من سيدي بوزيد
شي باغي لحم الضلعة
يحيد بيه ذيك الخلعة
شي باغي لحم الملج
ياكل ويتفجج
شي باغي الكرعين
ياكلهم مع الوالدين
حتى يخرجوا ليه من الوذنين
شي مشهي المخ
ياكل ويبخ
حتى يبان ليه طير الرخ
ويدفع علينا البخ
شي باغي من الخنشوش
باش يبقى بالعز مرشوش
وريشو يبقى ديما منفوش
ويدفع علينا لفشوش
شي باغي يعمر لمصارن
ياكل منهم ويقارن
وحصانو مايبقى حارن
شي باغي الكبدة والقلب
ياكل هو وموالين الدرب
شي باغي لحم السلسول
ياكلو بكلام معسول
شي باغي الذيالة
تبعد عليه البلا
وتحيد ليه الدربالة
شي باغي الكرداس
باش مايبقى محتاس
يدير الذهب
ويحيد النحاس
ويصحصح لينا
مايبقى نعًاس
واحد باغي غير الجلد
يديرو هيدورة ويسجد
يحفظ كلام الله ويعبد
باش يلا جاه الليل يخمد
واحد باغي اللسان
ياكل طريفات بنان
شي باغي الضرع
قال ليك كيحيد الصلع
تمة بقى ياكل ويبلع
والناس تشوف وتسمع
شي بغا يدير لخليع
ياكل منو ويبيع
فين كنتوا
يا جماعة الشلاهبية
قبل ماتطيح البقرة؟
كنتوا فدار غفلون
بين قصاير الملحون
تبخوا فالسيكار
والغليون
والرقص على لقعادي
والكيسان
ذوك الكيسان يا سيادي
واللي فيه الحال يبان
الطايح كثر من النايض
والجيب ديما فايض
حتى طاحت البقرة
عاد مواسكم امضاوا
اللي سبقوكم آش اداوا؟
شحال احكاوا
شحال ادواوا
شحال من مواس مضاوا
شحال من بقر طيحوا
وشحال من بقر كلاوا
نتشوا نهشوا
نهبوا سلبوا
إيوا من بعد
من هاذ الدنيا آش اداوا؟
شبر من الأرض
وحفنة ديال التراب
ماتجيب عز
ماتعمر قراب
على قبورهم
ماتسمع غير نواح البوم
وزعيق الغراب

: منتديات الأستاذ التعليمية التربوية المغربية : فريق واحد لتعليم رائد https://www.profvb.com/vb/showthread.php?p=147152

التوقيع

أينكم يا غايبين ؟؟؟؟
آش بيكم دارت لقدار مابان ليكم أثر ولا خبروا بيكم البشارة

آخر تعديل ابو العز يوم 2010-05-25 في 22:40.

2010-05-25, 22:32

رقم المشاركة : 2

عازف الليل

بروفســــــــور

إحصائية العضو

عازف الليل غير متواجد حالياً

رد: طاحت البقرة كثروا الجناوة

أنا باغي غي الهيدورة الله إرضي عليك٠ هههههههههه
مودتي أخي الكريم

التوقيع

Soyez le changement que vous voulez voir dans le monde. Gandhi

2010-05-25, 22:46

رقم المشاركة : 3

ابو العز

نائب مدير الأفكار والمشاريع الأستاذية

إحصائية العضو

ابو العز غير متواجد حالياً

رد: طاحت البقرة كثروا الجناوة

اقتباس:

المشاركة الأصلية كتبت بواسطة عازف الليل

أنا باغي غي الهيدورة الله إرضي عليك٠ هههههههههه
مودتي أخي الكريم

نعم الاختيار أخي عازف الليل
عزفك الليلي يؤنسني
دمت بالجوار
لك السبق أخي
الباقة من نصيبك:

التوقيع

أينكم يا غايبين ؟؟؟؟
آش بيكم دارت لقدار مابان ليكم أثر ولا خبروا بيكم البشارة

2010-05-25, 22:58

رقم المشاركة : 4

الزرقاء

بروفســــــــور

إحصائية العضو

الزرقاء غير متواجد حالياً

رد: طاحت البقرة كثروا الجناوة

بديتي القصيدة بالزردة
شعلت الفرينة
تميتيها بزعيق الغراب
حسيت بالغبينة
هههههه

مشكوووووور أبا العز، ذكرتيني بقصيدة الزردة ف فن الملحون .
دامت قريحتك فياضة ،وحريفاتك ديما موجودة .
تحيتى المسائية .

التوقيع

2010-05-25, 23:15

رقم المشاركة : 5

ابو العز

نائب مدير الأفكار والمشاريع الأستاذية

إحصائية العضو

ابو العز غير متواجد حالياً

رد: طاحت البقرة كثروا الجناوة

اقتباس:

المشاركة الأصلية كتبت بواسطة الزرقاء

الله يكثر علينا الزرود أختنا الزرقاء.
أتأسف على العافية اللي شعلتي فالمجمر واهبات بلا ما تاكلي الزنان .
الغراب ولد الحرام حايد عليك الشهية.
أعدك أختي أن أذبح هذا الغراب حالا.
ونعيد إشعال المجمر حتى يزهر الجمر
ونديروا كباب.
ونعرضوا على لحباب.
ونعمروا الشاي.
بالنعناع والشيبة وعزف الناي.
دمت متألقة الزرقاء.
وأسفي على الزنان.

التوقيع

أينكم يا غايبين ؟؟؟؟
آش بيكم دارت لقدار مابان ليكم أثر ولا خبروا بيكم البشارة


	للتوصل بجديد الموقع أدخل بريدك الإلكتروني ثم فعل اشتراكك من علبة رسائلك :