الدمدومة

المغرب هو أجمل بلد في العالم, هادي ما كاين فيها لاخود ولا آرا, وفي ما يلي بعض الأسباب إيلا متقتوش :
- المغرب هو أجمل بلد في العالم,لأن الخلصة ديال المواطن ديالنا كتخليه مايسخسخش راسو ويفكر كيفاش غادي يخسرها. الخلصة كتخسر راسها براسها فالتلتيام اللولة ديال الشهر, ومولاها كينعس هاني البال الشهر كولّو بلا ما يخمم فين غادي يصرفها حيت ماكايشيط ليه والو أصلا..
-المغرب هو أجمل بلد في العالم,لأن الجرائد المغربية كتشوف أنها خصها تعفي المواطن مسكين من أنه يشريها كل نهار حيت مافحالوش, و كاتبقا تعاود فلخبارات وكتشدّ الستون بالمعيور فبعضياتها, والنتيجة أنه كيقدر المواطن مسكين يشري جريدة وحدة فالشهر ولا السيمانة بلا ميحس بأن شي حاجة فاتّو..
-المغرب هو أجمل بلد في العالم,لأن الأحزاب السياسية ديالنا عندها رأي واحد فأي قضية , والشعار: لا يسار وطيد, ولا يمين عتيد, وكلنا في خدمة المخزن الجديد..
-المغرب هو أجمل بلد في العالم,لأن التلفزيون ديالنا هاز الهم للمواطنين ومكيبغيش يفقسهوم بالخبارات الخايبة, وهو مستقل كليا على أي حاجة يمكن تنغص عليهوم حياتهوم, كاين غير الشطيح والرديح والنشاط هاهو شاط و الأفلام التركية والهندية ديال الحب والغرام..
-المغرب هو أجمل بلد في العالم, لأن المسئولين دياولنا كيخافو على حياة المواطن , وكيخليو الطرقان ولوطوروت محفّرين بلعاني باش الطونوبيلات مايمشيوش بجّهد ومايكونوش لكسايد بزاف..
وطبعا ماغاديش يكدنا ليسباس باش نكولو كاع هاداك الشي اللي كيخلي بلادنا أحسن بلاد فالعالم.. واللي مابغانا تعما عينو..

هيسبريس.

أنا عاد عرفت علاش حنا زوينين .كنت ديما كنقول مع راسي معرفت علاش حنا زوينين بزاف حتى فتنا القياس فالزين. هي كول بلادنا هي أجمل بلاد فالعالم. ياكما هدي شي كدبة ديال فبراير . ياكما انا ساكن فشي بلاد اخرى. انا كيبان ليا كلشي خايب . واقلا غير حيث داير نظاظر كحلين .صافي غدا ان شاء الله غادي نحيد هاد النظارات و نشوف هاد الزين فين كاين.