الدنيا سكنات ... السوايع وقفات ..[IMG]http://www.hespress.com/trigil/*****/files/newspublish/16908_2155862887_small_1.jpg[/IMG]
صوت الشعب

قبل مانبدا كلامي بغيت نقدم تحية من القلب ، لكَاع للي كيبغيو "ناس الغيوان"، و علا رأسهم الوالــد ديالي الله يججازيه بـخيــر ، هو أول واحد سمعتو كيدندن بالصّيــنيـــة و الهمامي وْ خـُـودونــي، ملي كنت صغـير ومازال مكنفهمش المعاني للي فدوك "لي پارول" ، و ليوم لقيت بلّي خاصني نرد ليه الصرف و ندوي عليه، و على كَاع عشاق "نــاس الغيــوان" و خصوصاً عشاق "العربي باطما" .
نهار السبت للي فات، 6 فبراير، كانت الذكرى 13 للرحيل ديال "العربي باطما" ، و تقووووول واش شي جريدة فيها شي ولد لمرة كتب شي سطـر بالمناسبة ( و الله أعلم إلا كنت زكَلت شي حاجة؛ 'كنتمنى' ) وحتى التلفزة والو، اللهم إذاعة "راديو مارس" للي تفكرو هاد القضية و دارو واحد البرنامج كانو فيه شي ضيوف من الوزن التقيل على رأسهم "عمر السيد"، البرنامج هدر فساعتين على الأسطورة الغيوانية وعلى جوانب من حياتو.
غادي نجرّك عزيزي القارئ لواحد "لاكومپاريزون"، وخا انا ماكانتبناش هاد الفلسفة ديال المقارنات ،ولكن، تشوف الأشقاء المصريين كيفاش كايردو ذكرى رحيل عبد الحليم ، الأم كلثوم او أحمد زكى عيد قومي، بكل ماكين فكلمة عيد من معنى، القنوات كاملة كتوجد لهادك نهار برامج كتهدر على حياة هاد الفنان و "لپالمرس" ديالو، وزيد سهرات من الأرشيف وشي قيامة تتخليك ترد بالك لهاد الحدث واخا تكون غير تتلعب "بتيليكوموند"، كتشدك لغيرة و دربك النفس على هاد الفنانة المزاغيب دياولنا لّي ماكيتمزك ليهوم حد، "شي نو سي أوتخ شوز" الفنـان إموت ولا إعاودها ليهم ، شكون داها فيه.
(لماذا لا اكتب "الرحيل الى الألم" مادام الناس فهموا كتابي الأول "الرحيل" الى الموت) . ماغاديش نحاول نتفلسف كتر من اللازم ولكن ملي حققت مزيان فهاد لافغاز لي كتبها سي "العربي" الله يرحمو فكتابو الثاني لي سمّاه "الرحيل إلى الألم" ولي هدر فيها على سوء الفهم لي وقع للناس مع الجزء الأول من الكتاب ولي كانت سميتو "الرحيل" (صافي) ، ملي عتاقدو بيلا كيعني بكلمة الرحيل مفهوم الموت ، ملي تمعّنت فيها بان لييا مالوروزمون ان داك سوء الفهم مزال هو هو، و ناس ليوم نساو بلي موت "باطما" ماكيعنيش رحيلو بمرة، حيت هاد الأسطورة سنا كونطرا معا الخلود بكلامو و كفاحو وجمهورو.
أخي القارئ ، وخا "صوت الشعب" خارج من هاد جيل قيمّش و كنتمزّك "لمســلــم" و"البيغ" وحافظ لي كّوپلي ديال "بــووبا" و"لافوين" ، كان خاصني نجبد هاد سوجي باش الناس لي عاشو ديك الفترة ينوضو يپارتاجيو معنا داكشي لي كيعرفو على داك العهد الغيواني الذهبي ، لحقاش كيما كان الحال "صوت الشعب" ودراري لي قدّو فالعمر كيبقاو غير سامعين . و كنتمنى يربّيوْ فينا حب الغيوان باش مانساوش هاد الموروث الثقافي واخا الناس لكبار كايقولو جيل نايضة مطيح سروالو و ماقاد علا والو، راه أو فون على بال ، غير عندو نظرتو الخاصة لمفهوم الحياة .
سويعة ، خليتكم على خير. يالاه