منتديات الأستاذ التعليمية التربوية المغربية : فريق واحد لتعليم رائد

عرش زيتونة يتيمة في واد الدم
.................................................. ................
شدو سلاحكم ما نبني قبري
من الدم
ما نحفر مشموم الكلمة فوق السحاب ونهدم
الكون ضرب الطم
وتعلم يقرا ويلبس علام الهم
القدس طفلة يتيمة
تبناها الغول والسبع يرسم
كتب حكايتها
التاريخ والكلمة في حيرة
ما تغوي ما تحلم
يا هوايش الخاطر
فرقي حروف النعمة
تكون قرطاس للعديان
من عناد النار توشم
يا مداين الحر
شدي بنادر الرعدة
تصب الشتا
حجارة من سجيل
على صهيوني طغيان ما ترحم
يا عيون الكمرة الباهتة
بصهد الرصاص
جمعي كمي للحمام
يعمر حجر رخام
نرشق ريوس العديان في الزحام
ما نرحم ما نترجى منهم كدم
كفنوني في راية الشهيد
نتوضى بالدم
ونصلي عمر الثورة
يكون الرجا للرب الغفار
تتحل السما دواية
ونكتب بجوج ايدين
نرفع راية الغواية
تتهز اللعنة من بوط الأرض تتوهم
تصرط الطغيان واحد واحد
يعاود التراب العجنة
نهزو الزيتونة من راس الواد
نحفرو ليها مشموم عليه
وصاو الأجواد وبناو قدس بالدم
نديرني عليها عساس
بدموع الحسرة نسقيها
وبشفار الحيرة نقلبها
وبحاجب الخاطر أنا نخاف عليها
ما يغلبني نوم ما نجثم
ما تقولو راه التراب ما مني ترصى
ولا الرصاص عليا رسى
راه المرسى وقف علام الموج يوصي
ما نوقفوا علام ما نْسَرْحُو كُصَّة
حتى يبان الفْكَد في الطفلة اليتيمة و تتبت و تترصى
ويتحقق الحلم

السعدية الفاتحي