|
شدرات ام زين شــــــــدرات ام زين يمكن الكسدة تنسى تتنفس ويمكن الشمس تنسى تشرق ويمكن الارض تنسى دمها وما يمكنش انا ننساك وماشي ساهل نمحي مداد الرغبة من الجوف يمكن العين تنسى النوم ويمكن اللسان ينسى اللوم ويمكن الريح ينسى يعوم وما يمكنش انا ننسى دمعة كنت فيها ساكنة يوم يمكن اللهى ينسى الريق ويمكن اللغى ما بغى يعيق ويمكن الشوم طاف وخاف يفيق وما يمكنش انا ننسى الروح اللي عليك تفيق يمكن النوم ينسى المسند ويمكن الليل يكعد في المهد ويمكن الظلام يلعب في جد ويمكن الروح تلبس اللثام وتعد وما يمكنش انا نهد تراب قبري بوتد يمكن اللوح يوشم الجروح ويمكن الرغبة مني حيوح ويمكن اللهفة فيا تنوح ويمكن المداد يندب وينوح وما يمكنش انا نطلي كساتي ببياض الروح يمكن الظالم يسكن قبرو ويمكن المظلوم يرسم ليلو ونهارو ويمكن الميزان يشد زهرو ويمكن العتلة ما وفات عبارو وما يمكنش انا نبرم اصباعي على ظهرو . ولا ننقش زهري على حجارو |
رد: شدرات ام زين حلفت نرجع للتراب ونعجن حروفي ونحطني نقطة نطفة نتوهج بين السحاب نلبس فروال المعاني ونذوب بين خيوط الشمس ونعيش العذاب في عش الغراب ندكني نقرة ماني نحاس بالكلمة جاني ولا ذهب من الحكمة يلقاني نفرشني سكة للخيل الصعاب نبرم ريق الحلام على مرود الزمان ونشرب دموع الضباب ونلقف اللقمة من فم الطير اللي مني يغير ونكتبني بمداد يحير في عذابي احلفت نشرب بحر الموت ونموت راضية على مكتابي ونعزيني فيا وفي اهذابي نلوي دراع الحلفة في فم الكلمة ونسوكها بالعمى قدامي ونهزني من كفايا ونقراني وشمة في ضباب احنا ونتوضر بين موجات الحلفات وننشر حصاد الهنا ونحش ركابي الرعد بمنجل العمى ونخيط الدات بمخيط المحنة ونقـــــــــــــــول شهد يا ريح الكلام راه النقطة تكبت في ظهر الزحام والسطر حل فمو يسرط عظام القبر من الرخام |
رد: شدرات ام زين سرجت ظهري للزمان نبني سكة من احلامي وتران من مجدول محاني ونسوك وما نتساك ونشوف وما نتشاف نرسم الطريق على الما ونعكز على نجمة نابثة في ضرع المعنى تبان سرجت حروفي وعلفت اهدابي شتا وسلحت دموعي صبر عليا فتا الوقت كيف الذهب الوقت كيف الشهب اللي طاح وتزلع في الهوى وجمعني حب حب الوقت سحابة ضاقت من العلا وطاحت تقلب على الوطا على نقطة دالجة بين شفار الموج وتخاوي الركدة في الصلا الوقت سيف الوقت خريف مرة شتا ومرة ريح مرة دفا ومرة ولفة على ورقة نابتة في الصيف الوقت كيف الريح مرة تشهق ومرة تزهق تعمر من البير المهجور دلو العمر وتشرب عبرات الكيل ذنوب وماتهضر تفاجي نار مني تسيح الوقت كيف اليد اللي ماتصفق وتصرفق مرة ليك ومرة عليك مرة تسافر بك بعيد مصاب نوقف الحساب ونهز باب المعنى ونرصي الضباب على الكتاب ونوقف الاوتاذ على ودعة عزبة ونمحي تراب المحنة على شفر العذاب مصاب الركدة تحني رجليها وبياض الليل يطل عليها بعين واقفة بين الشهقات تنسنى شكون يواسيها |
رد: شدرات ام زين محال واش القلم يرصي السحاب على رمش القطرة في ميها ومحال واش الارض تضحي مازال بتراب رجليها ومحال واش السما تبكي على ما داز عليها .ومجال واش باقي فيا ما يجمع عظام رضعها الزمان وبقيت ننش عليها |
رد: شدرات ام زين نتوسد نعاسي على ركبة فياقي ونشرب الظلمة كاس كاس ونتكرع النجوم من داتي نسكن الليل ونشد منو الظلام ونلون قلبي ونكسيه رخام يتلبد ويتكبد في طرف الحلمة ونلبسو لثام مانشوف الشوف ومانقرا الوطا لهطة في وراق تبني على ظهري ايامي مرشكة بالسيوف المعنى اوهام نتفافى برجل المحنة نقلب على الطايح من النايض من اعضامي في تراب معجن بين كفوف الرعد نلبس عيون الحجلة ونعيش قصايد مجبدة على سطور مفاوتة ونحلم بالطريق تستوى بين النقطة والنقطة نسكن ونعشش في راسي بخيوط السحى والكلمة المالحة مني تقاسي .اش دواك يا لساني تتنطط بين الدروب وتجوب على نقاطي سلمات في الحرف وبقى صايم الليل والنهار في كماط السطر يسطر |
| الساعة الآن 04:27 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd