|
رد: مذكرات معلّم في العالم الحضري كنت أخي حوميدي بدون شك رائع وسيبقى للأبد صيتك ضاربا ذائع وأنا لباقي مذكراتك الممتعة جد جائع ولسلسلتها المشوقة ممتعة ءأنا جائع ولكل قصة لك رويتها طبعا لها أراجع جميع ماتدونه لمعلم سيعوضنا له نافع الى قصة من مذكراتك يوم غد سارع أحطت بمعاناة المعلم أجل أنت بارع |
اقتباس:
وسيبقى للأبد صيتك ضاربا ذائع وأنا لباقي مذكراتك الممتعة جد جائع ولسلسلتها المشوقة ممتعة ءأنا جائع ولكل قصة لك رويتها طبعا لها أراجع جميع ماتدونه لمعلم سيعوضنا له نافع الى قصة من مذكراتك يوم غد سارع أحطت بمعاناة المعلم أجل أنت بارع |
رد: مذكرات معلّم في العالم الحضري الحلقة رقم 42 : مذكرات حوميدي في العالم الحضري مع صديقي السقْرام (تتمة المغامرات) الجزء الثالث :خونا بالله لْقى شي فيكْتيمْ دازت أيّام وأسابيع ، خونا بالله نبيل مابْقاشْ بانْ.واحد النهار كنت فالسوق ، كان يوم الأحد.تْلاقيتْ بخونا السقْرامْ يشري فالخوردة .غير شافني سلّمْ علي وعنّقْني بْحالْ الى ما كاينْ بيناتْنا والو.خوكم الحوميدي دائما قلبو أبيضْ من لحليب، عْرضْ عليه باشْ يمشي يتْغدّى مْعاهْ ولكن هو كان معْروضْ عند شي واحد .زاد قال لي باللي الزوجة ديالو وجوج بناتو راهوم فالدار ديال السيد. شفتو : خونا بالله لْقى فيكْتيمْ (victime)من غيري. سوَّلتو على هاد السيد، قال لي باللي راه دارْ مْعاه العرْفْ فْشي درس نموذجي كان جْمعهومْ فْشي مدرسة.بالطبع هاد لكلام ديالو ما يمكنشْ يدخل لوْدنْ ديالْ حوميدي بْلا ما يْدوْزو فالسْكانيرْ (scanner)ديالو وطبعا راه لعْنبْ فْلعنبْ.(لكْدوبْ فلكْدوبْ) آشْ دخّلْ تاوريرت مع دبدو ؟ ياكْ ما مفْهمْتو والو ؟ غادي نشرح ليكوم : خونا بالله كيخدم فالنواحي ديال دبدو وهاد لمدينة بعيدة على تاوريرت ب50 كيلومتر.المهم ما عندو حتى علاقة مع تاوريرت حيت المفتشين ديالها ماشي هوما اللي كاينين عندهوم.دابا راكو عقتو باللي خوكم السقرام كيكدب علي. المهم قلت لو : _ شْحال هادي وانت تْجي عندو؟ _ من النهار اللي ما بْقيتشْ نْجي عندك قبل ما نْودْعو قال لي : لْمدامْ راها حامْلة وراها فشهرها الثامن خوكم الحوميدي قالّو : الله يْكمّلْ على خيرْ _ اوى عنداك تنسى راكْ معروضْ لسْبوع الجزء الرابع : أخبارات خونا بالله وصلاتني دازت أيّامات ونْسيتْ خونا بالله حتى تْلاقيتْ شي واحد أستاذ عندي مْعاه شي معرفة سطحية.هاد السيد كنت تقريبا كنتْلاقى مْعاه فالتْرانْ مينْ نمشي لْوجدة. كْلامْ يْجيبْ كْلامْ ، تْكلّمْ لي على شي مجموعة مدرسية فالنّواحي دياتلْ دبدو.سبحان الله العظيم ، حْكى لي على خونا بالله .قال لي باللي شي معلّم ما عمْرو ما شافو شي واحد جيعانْ بْحالو ادْزادت عندو بنت والمعلمون والمعلّماتْ شدّو فيه مزيانْ باشْ يْديرْ شي صدقة .فعلا أعْرضْ عليهوم.لخّوتْ تْفارْضو وجمْعو لو شي بركة مهمة يمكن شي 1.000 درهم. على ما عاود لي هادْ الأخ باللي هاد الجعْواني (مصطلح حوميدي يعني جيعان) جْمعْ المعلمين فْجهة والمعلّمات فْجهة واعطى لْكلْ مجموعة طبسي طعام فيه دجاجة. خاصكوم تعرفو أن العدد فكل مجموعة كان تقريبا 12 الفردْ. خوكم الحوميدي ، قال للسيّد : هاد السيد ماشي سْميْتو نبيلْ؟ الأستاد تبْهضْ : هو بْداتو! واشْ تعَّرْفو ؟ _ لا ولكن سْمعتْ بيه. واشْ أنا غبي باش نقولو راه كان فاتح المطعمْ عندي أيّامات وْأسابيعْ. المهم دازتْ أيّامات وبالصدفة تْلاقيتْ بيهْ: _ حْشومة عْليكْ خويا حميد كنتْ مْعوّلْ عليك تْجي تْباركْ لي المولودة _ عندك الحق ولكن ما كانشْ عندي النْهارْ ديالْ السبوع ديالْ هاد المبروكة _ واه والله الى عندك الحق.ولكنْ راني صيفطْ ليك لوْصاية مع صاحبك عبد الرحمان مول الحانوت _ اوى خويا راه ما كالْ لي والو _ ما يْكونْ غيرْ نْسى ماعْليهْ ولكنْ خاصّك تْجي .أنت راكْ صاحبي _ واخّا غادي نْشوفْ _ شوفْ والله حتى تْجي لْعندي والطاكسي على حْسابي _ بارك الله فيك عندي فلوسي. _ راني عارف ولكن أجي مْعايا وغادي تعرفْ فعلا مْشينا لواحد لبْلاصة كيوقْفو فيها الطاكسياتْ.سوّلْ على موسْطاشْ.فعلا جا واحد السيّدْ غْليضْ بْحالْ لعْجلْ ولكن ما عندو موسْطاشْ. خونا بالله قال لهاد لعْجلْ : خويا موسطاش هادا حْبيبي وخويا وصاحبي بْغيتك تْجيبو هو ومْراتو وتْحطّو حتى بابْ الدّار ديالي وخْلاصكْ راه عندي. موسطاشْ شافْ فيا وقالْ لي : وقْتاشْ ناوي تمشي؟ _ الله أعلم _ أخويا خاصّكْ تْشوف النهار اللي باغي تمشي فيه .أنا ما رانيشْ مْسالي .نقدر ما نْكونشْ. _ واخّا هادْ الحدْ الجايْ _ صافي .أجي مْعى العشرة .غادي نْخلّي ليك جوج بْلايصْ نبيل ضْحكْ وقال لي : الله يفرحك خويا حوميدي. الجزء الخامس :خونا بالله خْوى بينا هي هاديكْ مْشينا للقهوة .منْها نشربو شي حاجة ومنْها نتكلمو.كانت مناسبة وتكلّمنا على السبوع ديال بنتو . خونا بالله حْكى لي كولشي من الطاق طاق حتى لسلام عليكم.واه خونا بالله يْفوح بْلا حشمة وبْلا حْيا.اللي حْكى لي ما يمكن يصدقو غير شي صْمكْ. قال لك أسيدي يوم السبوع ديال بنتو عْرضْ على لقبيلة كاملة لدرجة أنّ كانت لعْراضة بالأفواج : فوج داخل وفوج خارج.يمكن كانت ديكْ 40 طابلة اللّي كْلاتْ وشرْباتْ. فكلْ طابلة 4 ديال الدجاجات وقْنية.أما الفواكه كولشي الفواكه المعروفة واللي ما معروفاشْ كْلاوْها الضْيافْ. اللبن كانْ يْسيلْ بالويدانْ بالنسبة للمعلمين والمعلّماتْ، تْهلّى فيهوم مزيان .قال لك أسيدي هوما كانو 4 فالطابلة وكل واحد عندو دجاجة أو قْنية (ما عْليهوم غير يختارو) . المهم داكْ الشّي اللي حْكى لي راه حتى السندباد البحري ما يقدر يحْكيهْ رجعت للدّار وحْكيتْ للزوجة ديالي.هاد لمْرى ديالي باقي فيها الخير ، قالت لي : خاصنا نمشيوْ نباركو ليهوم. ردّيتْ عليها : داك الشّي اللي كنت ناوي.نهار الحدْ ان شاء الله نمشيوْ فالسبت شْرينا الكادو . آه نْسيتء نقول ليكوم أن خونا بالله وصّاني باشْ نشري لو شوية الخضرى حيت فلعروبية ما عندو مين يشري من غير السوق الأسبوعي. فعلا شرينا البطاطا والماطيشة واللفت وخزّو وشْرينا شْوية كفتة والخبز والعصير. مع ديك العشرة ديال الصباح، كان موسطاشْ كينْتاضرْ فينا.ركبنا حنا فلبلاصة القدّامية. مْشاتْ الطاكسي ديك 30 كيلومتر .دازت تقريبا ديك 40 دقيقة ، وْقف مول الطاكسيي حْدى مدرسة وقال لي : هادي هي المدرسة ديال صاحبك. نْزلنا من الطاكسي .مْشيت باشْ نْدقْ حيتْ باب المدرسة كان مسْدودْ.يمكن دازت ربع ساعة وحتى واحد ما حلْ لينا الباب. واه السيد راه زعما فخْبارو باللي غادي نْجيوْ عندو .زعما فين يكون مشى؟ شي وْقيتة دازتْ شي مْرى مع بنتها وقالت لينا : _ ياكْ ما جيتو عند الأستاد نبيل ؟ _ نعم الشْريفة. _ ما عندكوم زْهَرْ.راه معروض عند شي ناسْ فلغدا. خلّاتني شي يْشوف فْشي.المشكل من لوقيتة اللي مشى موسطاشْ حتى طاكسي ما دازتْ.باشْ تعرفو باللي هاد الطريقة تقريبا مقطوعة. دازت تقريبا جوج ديال الساعات.خوكم الحوميدي عْيى والزوجة ديالة ماتت بلعْيى. اللي كان فْرعت واحد السرْجم ودخلت منّو باشْ نفتح القسم.هي هاديكْ دخلنا. واحد لوْقيتة جعنا .ما لْقينا ما ناكلو غير ماطيشة بالخبز. شفتو هاد عدو الله عارضْ علي ولكن مشى حيت حتى هو عارْضينو بْلا ما يْفكّرْ فيا. الصراحة سبّيتْ فيه وما خلّيتْ ما دْعيتْ فيهْ. الجزء السادس :هادي طاكسي أو علبة سردين ؟ مع ديك الربعة ديال لعشية ، جا خونا بالله بْحالْ الى ما فْراسو ما يْعاود: _ مفاجأة هادي خويا حميد! تبارك الله عليك راك درْتيها ولكن خْسارة راكْ ما علمتْنيشْ ... _ الله ينْعلْ اللي ما يحشمْ.واشْ هاداكْ وجهكْ واللّى كْفاكْ ؟ _ مالكْ أخويا شفتكْ غضبانْ _ والله ما عندك الكلمة .تابع غير كرشك يا بركاشْ جاب الله كان مْعاهْ نسيبو.بالطبع خونا بالله كان خايف من التبهديلة .هي هاديكْ شْرحت لهاد النسيب اللي كاينْ.الصراحة كان راجل وما شي بْعيدْ يكونْ احْتاقْرو. فالحقيقة ما خلّالوشْ: _ سّي نبيل هاد الخدمة اللي درتي ما يْديرْها غير الشْماتة خونا بالله بْدى غيرْ يْتلَّفْ بالهضرة.المهم على وجه النسيب، برّدْتْ دمي.لأنّه فالحقيقة فْديكْ لوقيتة كنت غادي نرجع لتاوريرت والنسيبْ حْلفْ عليا باشْ نبقى. خونا بالله كان خاصْو يْديرْ لعشى.لفضيحة الكوزينة عندو خاوية ما فيهاشْ حتى البصْلة. الزوجة ديالي جبْداتْ الخضرى والكفتة وقالت ليهوم : حنا الضياف جبنا ليكوم ما تاكْلو. خونا بالله حْشم ْ ومْشى دغيا يْقلّبْ على شي دجاجة يشريها.المشكل حتى واحد ما بْغى يْبيعْ لو.باين باللي راه واكلْ ليهوم دجاجات بلا ما يْخلّصْهومْ. ولكن حيت هو خبيت ، قال ليهوم باللي شي معلّم راه باغي شي قْنية .جا شي واحد مسكين واعْطاني قْنية وقال لي هادي فابور ليكْ. خوكم الحوميدي ديما ربّي ناصرو على عدْيانو. المهم قلت لو : هاكْ دبح لينا هاد لقنية وأنا نْشوف دمها يْسيلْ _ كيفاشْ خويا حميد واشْ ما بْقاتْشْ التّقة بيناتْنا ؟ _ انت ما فيك تقة ، تقدر تبيع هاد لقنية صافي خونا بالله عْرف باللي حوميدي كيحتاقرو بْحالْ نْسيبو والزوجة ديالو. المهم ديكْ الليلة قصّرنا حتى لْديكْ لحْضاشْ ديال الليل.كان عليا ننعس وخاصني نْفيق مع ديك الربعة ديالْ الصبح باش نرجع لتاوريرت.خونا بالله كان تْفاهم مع شي واحد عندو طوموبيل فوضى باش يركّبني معاه. المشكل مين جا ووْقفْ حْدى الباب ، كانو راكبين فالطاكسي 7 ديال الناس.آه يا خوتّي أول مرة كنشوف بْواطا (boite)ديال السردين بْحالْ هادي. الزوجة ديالي بْقاتْ حتى للصباح حيت أنا متبوع بالخدمة وخاصني نكون فالمدرسة مع التْمنية. ركبت وزادو لخّوت اللي راكبين تْعصرو.المهم يا الله تمشينا ديك 10 كيلومتر ، زادْ طلّع جوج أخْرين.دابا حْنا كْلنا 11 واحد فالطاكسي : 5 القدّام و6 فالخلْفْ باشْ وصلنا لتاوريرت درْنا تقريبا 2 سْوايع و30 دقيقة.مين وصلت للدار ديالي كانت 8 قلْ عشْرة هداك النهار جاني النعاسْ فالقسم وكان باين عليا لعْيا وجوج مرات وخوكم يْطيحْ فالقسم. شي وْقيتة شافني المدير وقال لي : أستاد راك عيّان سير دابا ترتاح ما ترجع حتى لْغدّى مْشيتْ هي هاديك.من بعد جاتْ الزوجة ديالي وقالت لي باللي جا معا نبيل فالطاكسي ديال موسطاش. من داك النهار تْقطْعات الصلة بيني وبينوحتى اليوم انتهت القصة المتعلقة بصديقي السقرام نبيل |
رد: مذكرات معلّم في العالم الحضري الحلقة رقم 43 : حوميدي والانتقال الى مدينة وجدة الجزء الأول : بداية الزهرْ بانتْ مع لعْراضة حوميدي كان ديما كيْشارك فالحركة الانتقالية بْحال جميع المعلمين ولكن والو !!!!!!!!!!!!! خوكم كيتفْقصْ بالمعقول.هي هاديك ما تبقى تْبانْ ليه لا عطلة لا حتى شي حاجة. الصراحة من بعد بْقيتْ نكتاشف باللي الانسان كيتصرّفْ ببلادة حيت عْلاشْ مْبرزطْ راسو وهو عارف ان كولشي بالمكاتيب.اللي بْغاها الله هي اللي تكون.شْحال من واحد ما بيه ما عْليه حتى رْجع لاباسْ عليه، شْحال من واحد ماكانشْ ناوي على شي حاجة وحتى جاتو لْبابْ دارو. المهم خوكم الحوميدي ما بْقاشْ ينتاضرْ النتائج ديال الحركة الانتقالية.صافي ما بْقاشْ يْسوّقْ ليها. واحد النهار تْلاقينا أنا وصاحبي بلخضر الصديق الحكيم واحد الأستاذ كيقرّي الانجليزية في تاوريرت.كانت ديك لوقيتة من أيّامات شهر يوليوز .خونا بالله عْرضْ علينا للعرس ديالو .اوى كان خاصنا زعما نمشيوْ باشْ نباركولو. المشكل ما نعرفوش الدار ديالو ولكن الاستاد اعْطى لينا لبلاصة اللي يمكن غادي ينتاضرنا فيها. هي هاديك مع ديك الستّة ديال لعشية ، ركبت أنا وصاحبي بلخضر فالطوبيس اللي يمشي لْسيدي يحي ونزلنا ومشينا لواحد التيلي بوتيكْ فينْ خونا بالله كان داير مْعانا الموعد. مينْ وصلنا لبْلاصة ما لْقينا حدْ.الاستاد راه نْسانا والله يحسنْ عَوْنو غير مع الفاميلة ديالو. شي شوية سونيتْ لو بالبورتابلْ ديالي .الحمد لله ردْ علي وقال لي راني جايْ لوقيتة اللي دخلنا للدار لقينا يا الله 4 ديال الناس : شي شباب ماشي بعيد يكونو اصْحابو.دازت تقريبا ساعة عادْ البشرْ المعْروضْ بْدى يْبانْ. شي شوية جاوْ الطلْبة باشْ يقراوْ القرآن. دازت وْقيتة ، جا خونا بالله وقال لينا أجيوْ تمشيو لواحد البيت فيها غير الشباب . خويا بلخضر رحّبْ بالفكرة .هي هاديكْ اتْبعناه.البيت اللي دخلنا فيها مْعمرة أساتدة والمشكل ما كاين الهضْرة غير على التعليم والحركة الانتقالية. الجزء الثاني : لخبر جا حتى لعندي شي شْوية التيليفون ديالي قال لي : تْكلّمْ لْمّالينْ الدارْ راهومْ بْغاوك. الصراحة كنتْ ناوي لوْلية باغية تمشي لْشي بْلاصة وراها باغية تطلبْ الإدْن أو ربما جاها شي ضيف وما عندهاشْ لفلوس ...المهم شي تْخربيقة بْحالْ هادي. ولكن اللي قالتو لي راه ما كانْشْ فالحسبان _ حميد واحد صاحبك في تاوريرت راه قال لينا باللي راك انْتاقلتي لْوجدة خوكم الحوميدي قْفَزْ واستغْربْ : ما يمكنشْ؟ راها الحلركة ما زالْ ما بانتْشْ _ هاد صاحبك قالك راها فالأنترنيتْ _ واخّا ولكن واشْ قالكْ الاسم ديالو ؟ _ سْميتو العربي _ صافي راني عْرفتو هادا الزوج ديال واحد المعلّمة كتخدم مْعايا فالمدرسة.مزيان. واشْ بعدا أعطاكْ النمرة ديال التيليفون؟ الزوجة ديالي كتفهم مزيان : راه عيَّطْ من تيلي بوتيك _ خْسارة ما نقدرشْ نتّاصلْ بيه المهم قبل ما ننْهي المكالمة قلت ليها في حالة الى العربي عاود اتّاصل تعطيه النمْرة ديالْ البورتابْلْ ديالي صاحبي بلخضر قال لي شفْتك غير ترْجف ، ياكْ ما جاكْ شي خبرْ زينْ _ بْحالْ الى علمك الله .راني انتاقلت لوجدة _ مبروك عليك خويا حميد والعقْبى لينا لخّوت كولهوم بْداوْ يْسوْلو : آشْ كاين؟ خويا الحكيم قال ليهوم : هاد الأخ راه حنْ عليه ربّي وراه انتاقلْ لوجدة فْديكْ لوقيتة جا عندي الاستاد ديال الانجليزية وقال لي : حتى أنا راه جاني خْبر باللي راني انتاقلت لْجْرادة ولكن ما بْغيتْشْ نْتيَّقْ دابا مين عْرفتْ باللي أنت انْتاقلْت ، صافي تيّقْتْ كولشي فرحو وقالو يا رب لا تحرمنا حتى حْنى من الفرحة ديالْ لخّوتْ الصراحة هاد الخبر نسّاني كل ما عانيتْ من عزوبية طيلة 11 سنة.تفكرت هاد عدو الله ديال المدير ولكلام اللي كان قال لي : والله حتى تْشدْ المستوى السادس وبالسيفْ عليك. دابا نقدر نقولّو : اربح بيهوم بْجوجْ الكامبو.راكْ درتي العيب معايا فابورْ. الجزء الثالث : وقْتاشْ تْجي غدّا ؟ لعْشا ما حسّيتْشْ بيه.الفرحة كتْشبّعْ. كنت غير نسْتنّى غير وقتاشْ نمشي للدّار ..كنت فالحقيقة ننْتضَرْ الصباح ديال الغدْ ليه باشْ نمشي لْشي سيبيرْ باشْ نجْبدْ اللائحة فْديكْ لوقيتة (2005) كان خوكم الحوميدي كانبو فالمعلوميات وحتى الحاسوب ما كانشْ عندي بعد العشاء وكيسان أتاي، الطّلْبا دارو الفاتْحة بالدعاء .باقي عاقل على شي دْعاوي ديال لفقيه على النْصارى : الله يْشتّتْ شملْهوم .الله يجعل هوم غنيمة للمسلمين.الله يعطيهوم الطّاعون....المهم شي دْعاوي كانو ديما يقتلوني بالضحك.خويا بلخضر قال لي : شوف هاد العرب غير يْعمرو كرْشهوم يقلبوها دْعاوي على النصارى حيت هوما ديما كارهينْ هومْ. هاد النصارى ما عندهوم زْهر ، شْحالْ من حاجة اختارعوها وحْنا كنسْتعْملوها وشْحالْ من مرض لْقاوْ لو العلاج.كونْ ما هوما كونْ شْحالْ هادي باللي انْقارضنا. فالتالي لعرب كيدعيوْ فيهوم بالشرْ ولكن هوما ديما منتصْرين علينا حيت ربي ما كيسْتاجبْشْ لينا. المهم خرجنا من الدار بعد ما قلنا لصاحبنا لعْريسْ: الله يْكمّلْ بالخير دابا خاصْنا نلْقاوْ شي طاكسي.المشكل شْحالْ تْمشّينا باشْ لْقينا وحدة . هاديك الليلة طارْ لي النعاس .شْحالْ قريتْ من استغفر الله واخّا انا بايتْ مْعشّي. الجزء الرابع : البحت على النتيجة فالسيبير وعند النقابات المهم فالصباح غير فقتْ قلت مع راسي نمشي نْشوف شي سيبيرْ. من الزهر ديالي الكونيكسيون كانت تقيلة وحتى نتيجة ما بْغاتْ تْبانْ. هي هاديكْ واحد الصديق قال لي : سير للنقابة ديال الدجاج راها معلقة النتائج ديال الانتقالات.خوكم الحوميدي اطْلقْ رجليه للمكان ديال النقابة بْلا ما يشكر صاحبو. وْصلت وانا كنْحطّم الرقم القياسي فهاد المسافة اللي كنت كنقطعها شْحالْ من مرة في ظرف 3 ديال الدقائق بدلْ 20 دقيقة. آه يا خّوتي المقر ديال النقابة مْزوكَمْ بالوجدية تعني البشرْ بْلا حساب.كولهوم كيْقلبو على سْمياتهوم. خوكم ماشي طويل بزاف باشْ يْشوفْ ، بْقى يْساينْ زعما شي مجموعة تخْوي لبْلاصة ولكنْ شكونْ اللي باغي يتْحرّكْ من بْلاصْتو ؟ شي شْوية واحد صاحبنا جا لْعندي وقال لي : ياكْ ما جاي تشوفْ واشْ خْرجتي فالحركة الانتقالية؟ ردّيتْ عليه : جيتْ غيرْ باشْ نتْأكَّدْ حيت قالو لي شي ناس الله يجازيهوم بيخير راني انتاقلت خونا بالله ضْحكْ وقال لي : لاواهْ لبْعابَعْ!!! ما انْتاقلتي ما والو _ ما يمْكنْشْ ؟ _ انتاقلت بعدا أنا اللي قْديمْ عْليكْ في تاوريرت صافي خوكم الحوميدي غادي يسكت ليه القلب.الدنيا بْداتْ تكْحال ، غير شْوية وغادي نفْقدْ الوعي. جاب الله كان دايزْ صاحبي حسن .غير شافني جا لْعندي يجري : مبروك خويا حميد الانتقال خوكم الحوميدي باقي مصْدوم من لخبر ديال عدو الله. _ ما يمكنش ما كين والو خويا حسن _ بالعكس خويا حميد والله الى راك منتاقل _ ولكن ما رانيشْ خارج فهاد اللائحة ديال نقابة الدجاج _ أجي مْعايا وغادي تْشوف اسميْتك بْعينيكْ _ فينْ لْقيتيها ؟ _ فالنقابة ديال سوق الذهب _ ياكْ ما عند خوتنا لخوانْجية _ واه أخويا حميد _ يا الله دابا نمشيوْ ليهوم ولكن فالطاكسي راني ما قادر نتْحرّكْ فعلا ركبنا فالطاكسي .غير وصلنا مْشيتْ ديريكتْ كنْقلّبْ على الاسم ديالي.هاد حسن الله يكثّرْ من امتالو .كانْ مارْكاها بالستيلو: _ شوف هاداك الاسم اللي عليه سْطرْ بْلحْمرْ _ واه والله الى انتاقلتْ والله الى انتاقلتْ _ شفتي وانت أصاحبي مْقلّقْ على والو _ ولكن هاداك عدو الله قال لي راه ما كايناشْ سْميْتي فاللائحة.زعما يكون كْدبْ علي؟ _ خويا حميد راه الحقد كيعْمي العينينْ _ عندك الحق _ دابا خاصني نعلم لوْلية (الزوجة) باللي نيشانْ راني انتاقلت. هي هاديك قلت لصاحبي حسن : خويا حسن تسْتاهل الكادو ردْ علي مسكين : الكادو هو تحمد الله _ عندك الحق . هي هاديك طول الطريق وحْنا نتْمشّاو حْمدتْ الله. مينْ وصلنا للشارع ديال محمد الخامس قلت لو : أجي نشربو شي عصير ديال الفواكه هي هاديك شربنا جوج كيسان ديال الأفوكا. انا رجعت للدار ولقيت الزوجة ما زال ما مطمائنّة ولكن غير شافتني فرحانْ عرفت باللي راها القضية فيها (ماشي إنَّ) دازت واحد الاسبوع ، طْلعت لتاوريرت باشْ نْجيبْ حوايجي .دزت للدار فاللّوّلْ و منْ بعدْ للمدرسة . مع لعشية وانا راجع لوجدة قلت لتاوريرت : الوداع يا تاوريرت وخا فيك شي ناس عْزازْ علي كاين شي كْمامرْ(وجوه) يسْتاهلو نْبعّدْ عليكْ رغم هدا كلّو ، مْشيتْ لتاوريرت شْحالْ من مرّة باشْ نْزورْ الاصدقاء ديالي القدامى خاتمة ظريفة : حوميدي ديما نشيط انتهت مذكرات حوميدي في العالم الحضري.دابا حوميدي كيشتاغل في مجموعة مدرسية كتبعد على وجدة ب34 كيلومتر .كل صباح من غير السبت والأحد كيمشي يخدم ويرجع مع الجوج و30 دقيقة.فالبادية كاين كي العادة التكرفيصْ وخاصة حيت كنت آخر من التحق عانيت تقريبا جوج ديال السنوات فواحد الفرعية فيها البيسْتْ وكان عندي مشاكل مع السكان ومع المدير هاديك قصة أخرى ، شي عام نْعاودها ليكوم بْحالْ الحجاية ، شي عام إما نْكون خْديتْ التقاعد ديالي أو نكون انتاقلت لمدينة وجدة. على كل حال ، خوكم الحوميدي دائما عضو نشيط وكيخدم بْنيْتو والحمد لله فهاد الساعة راها عندو شْحالْ من مسؤولية كيْقوم بيها بدون أن يقول (أحْ) أو يشْكي كما يفعل المعلمون مين تكترْ عليهوم الخدمة انتهى |
رد: مذكرات معلّم في العالم الحضري اتبارك الله عليك،بارع في سردك للقصة.ذكرتنا بمتاعب المجموعات المدرسية وفرعياتها.والصحبة محاسنها ومساوئها.والكثير من الأشياء التي تبكي وتضحك في نفس الوقت.بارك الله فيك. تحيتي وتقديري |
رد: مذكرات معلّم في العالم الحضري شكرا لك أخي حوميدي استمتعت مع مذكراتك كثيرا لاتحرمنا من إبداعاتك لكن سؤالي كيف درتِ رجعت تعمل بالبادية؟ بعد ماحقق الله أملك في الانتقال لوجدة أتمنى إجابة بمذكرات جديدة دمت متألقا |
رد: مذكرات معلّم في العالم الحضري اقتباس:
أختي أم إدريس ربما لم أكن موفقا في شرح هذه الفكرة أو ربما كانت أجوبتي مبهمة. لما انتقلت وقلت مدينة وجدة كنت أقصد ضواحي المدينة يعني السيكتور من جديد للأسف الشديد أنا الآن في سنتي التاسعة ولكن رغم هذا أنا أحمد الله رغم بعض المشاق في الطريق والتوقيت يبقى أن هناك إيجابيات مثل عدد التلاميذ الضئيل مقارنة مع العدد الموجود بمدينة وجدة شكرا على متابعتك وحتما سنلتقي مع مذكراتي في الطفولة ودائما باللغة الدارجة ليلتك سعيدة |
رد: مذكرات معلّم في العالم الحضري اقتباس:
أنت أيضا كنت بارعا في كل تعاليقك وفي حضورك البهي وحرصك على المتابعة من أول حلقة حتى آخرها بارك الله فيك وليلتك سعيدة |
رد: مذكرات معلّم في العالم الحضري حوميدي الانسان المميز لا أحد يتحداه في هذا الابداع القصصي السهل الممتنع ورأيت فيه فكرا خصبا عن تجربة وممارسة تربوية تجعلك ترجع الى الوراء وتبحث عن ارشيفك التربوي بمراحله عمل وجد ونشاط داخل الفصل هي التي نراها مهمة ولكن يرينا كيف يعيش المعلم خارج المدرسة كيف يتأقلم مع شرائح مختلفة في نمطها الحياتي وينذمج مع جميع مكونات المجتمع في الأرياف في الجبال في المناطق النائية وصعوبة الحياة بها ولو روت لنا نماذج من معلمين كل منهم يعاني من صعوبة حياة مع ذلك المحيط ومع ذلك نراه يبتسم لأطفاله لتلاميذه أمامهم ينسى كل متاعبه اليومية أقول لحوميدي برافو لأنك عيشتنا مع ناس تاوريرت ووجدة وهناك مناطق تعرف اكثر معاناة المعلم ولكنه يبقى النموذج الأعلى لتلاميذه ومع ذلك لايؤثر من شيئ على مساره التربوي |
رد: مذكرات معلّم في العالم الحضري http://www.dafatiri.com/vb/customava...ar231317_8.gif حوميدي الانسان المميز لا أحد يتحداه في هذا الابداع القصصي السهل الممتنع ورأيت فيه فكرا خصبا عن تجربة وممارسة تربوية تجعلك ترجع الى الوراء وتبحث عن ارشيفك التربوي http://www.dafatiri.com/vb/customava...ar100734_3.gif خويا بوشعيب حاولْ علي شي شوية ، خوك الحوميدي ماشي غير هو اللي متميّز هنا .كاينين تبارك الله كتّاب عندهوم ما يقولو لا في الشعر ولا القصة.كاين اللي عندو التميز في الردود بْحال الاستاذة شروق .كاين اللي غير يْبانْ كيدخّلْ الفرحة بخال خويا العمري كاين متميزين بْحال ولدي يوسف. ولكن عندك الحق خاص كل واحد قْرى هاد المذكرات يمشي يحفر شي شوية ويكتب لينا داك الشّي اللي راه مْخبّيهْ قبلْ ما تْجي شي وقيتة بنادم ما يبقى يعقل على والو http://www.dafatiri.com/vb/customava...ar231317_8.gif بمراحله عمل وجد ونشاط داخل الفصل هي التي نراها مهمة ولكن يرينا كيف يعيش المعلم خارج المدرسة كيف يتأقلم مع شرائح مختلفة في نمطها الحياتي وينذمج مع جميع مكونات المجتمع في الأرياف في الجبال في المناطق النائية وصعوبة الحياة بها ولو روت لنا نماذج من معلمين كل منهم يعاني من صعوبة حياة مع ذلك المحيط ومع ذلك نراه يبتسم لأطفاله لتلاميذه أمامهم ينسى كل متاعبه اليومية http://www.dafatiri.com/vb/customava...ar100734_3.gif تحية إجلال وتقدير لكل الأساتذة الذين يضحون من أجل إسعاد الآخر.الاساتذة راهوم رسل وعندهوم رسالة خاصهوم يوصلوها ولكن الظروف الحالية ما مْساعداش رجال ونساء التعليم خاصة اللي خدّامين في الجبال والصحاري الله يعاونهوم http://www.dafatiri.com/vb/customava...ar231317_8.gif أقول لحوميدي برافو لأنك عيشتنا مع ناس تاوريرت ووجدة وهناك مناطق تعرف اكثر معاناة المعلم ولكنه يبقى النموذج الأعلى لتلاميذه ومع ذلك لايؤثر من شيئ على مساره التربوي http://www.dafatiri.com/vb/customava...ar100734_3.gif خويا بوشعيب الله يعطيك الصحة والله يفرحك ويفرح كل واحد يبغي الخير لْخوه الانسان. راه الاساتذة كولهوم قدوة للمجتمع. الاستاذ راه المربي والمعلم والكاتب والشاعر والناصح والمستشار والمعالج والباحث ...هو كولشي. طبعا خاصّو يتْأقْلم مع الظروف المحيطة به الله يعاوْنو |
رد: مذكرات معلّم في العالم الحضري مذكرات جميلة السرد و الحكي بقلم المقتدر الحوميدي بارك الله في عملك و لا تحرمنا من كتاباتك الشيقة الممتعة و بالدارجة خالص تحيتي و تقديري الكبير لقلمكم المبدع |
رد: مذكرات معلّم في العالم الحضري اقتباس:
أختي أم علاء وعمر شكرا لك على التعليق والشهادة في حقي وفي كتاباتي باللغة العربية الدارجة الا أنه يؤسفني أن أخبرك أني لم أحس بالتجاوب الذي وجدته في منتديات أخرى ربما هذا هو السبب الذي دفعني ان أوقف إبداعاتي في هذا المنتدى مع إعتذاري للإخوة الأربعة الذين كانوا والشهادة لله مخلصين في المتابعة والردود اختي أم علاء وعمر راني كنت معاك صريح |
رد: مذكرات معلّم في العالم الحضري -*************************- شكرا جزيلا لك..بارك الله فيك... -*************************- |
| الساعة الآن 15:55 |
جميع المواد المنشورة بالموقع تعبر عن أصحابها فقط ولا تعبر بأي شكل من الأشكال عن رأي الموقع ولا يتحمل أي مسؤولية عنها
Powered by vBulletin® Copyright ©2000 - 2024, Jelsoft Enterprises Ltd