الـــبـــــقــــــــــــر
*-"أتاي العشية حسن من بقرة مشوية."
*-"البقرة الكركوبة لا محلوبة ولا مركوبة."
*-"البقرة ايلا طاحت كيكثرو الجناوة."
*-"البقرة كا تنطح أو ولدها كا يشطح."
*-"البقرة المعgـــازة من مشيتها تبان."
*-"البقرة كا تاكول فالشمندر أو قدامها باقي."
*-"البقرة ما يجي معاها السرج."
*-"اللي بغا الـبـــgــــر الله يطليه بزبلو."
*-"شافت الربيع ما شافت الحافة."
*-"الكي فالبgر والحمير تزعرط ."
*-"البنت اللي مايتدبح عليها بقر ما ليها وقر."
*-"عندو بحال الحنة بحال زبل البقر."
*-"لا تكسب (بقرة)نطاحة ولا تزوج (امراة) نواحة."
*-"ماخلاو طلابين اللبن للعجيلات مايرضعو."
*-"اللي بغا وقرو ينده بقرو."
*-"العاقل فالثيران نطّاح."
*-"تشوف الثور الأبيض،تقول كلُّو شحمة."
*-"شي فمُّو يشري ليه بقرة،شي فمُّو يبيعها ليه."
*-"البقرة ولدت قنفوذ جات تبوسو فيه الشوك ...بغات تلوحو ولدها."
******************************************

الــصـــداقـــــــة= الـصــحــبـــــة


*-"الصاحب لا تلاعبه و الناعرلا تفوت عليه...
اللي حبك حبه أكثر و اللي باعك لا تشتريه."

*-"الصحبة المغشوشة حكها يبان عيبها."

*-" امدح صاحبك مع الناس, و لومو الراس فالراس."

*-"ما تشري حتى تقلب و ما تصاحب حتى تجرب."

*-"الصاحب بالربح ماشي بالخطية."

*-"ما تعرف العدو من الصديق غير فالشدة والضيق."
********************************************

الــكــلــب==>حشاكوم
*-"الكلب اللي كينبح ما كيعض."
*-"كلب حي أو لا سبع ميت."
*-"ضرب الكلب و استحيى فوجه مولاه."
*-"فاطمة بنت الدرب ،باعت الدفة وشرات الكلب."
*-" الكلب ما يعضش ف ودن خوه."
*-"اللحمة معلقة أو لكلاب كا تقاتل عليها."
*-"اللي بغى يربِّي الجرو خاصو يقتل الكلب الكبير."
*-"تحابو الكلاب على رجلين الطلاب."
*-"الدم يتحلبى يتحلبى وخى يكون من الكلبة."
*-"السِّي بلا قراية،بحال الكلب بلا ضراية."
*-"الحليب للحباب واللبن للكلاب."
*-"الدار بلا باب ما تحتاج للكلاب."
*-"الكلبة المجرابة عمرها ما كتصيد."
*-"جوع كلبك يتبعك."
*-"ولاد الكلبة كاع كلاب."
*-"اللي دصر الكلب يلعق ليه شـواربو."
*-"الكلب غ كلب واخا يلبسوه الذهب."

*-"كال ليه :الجار كريم؟
كال ليه شوف حالة الكلب والبهايم."

*-"الحمار رافد الثقل والكلب كينين."

*-" تختار حتى تعيا،وتهز من اولاد الكلبة جرو."
*-"الكلب إلى ما نبح ما عندو فيه مولاه ربح."
*-"سعد الدباح ،الكلب ما ينبح،الدايز يقول آح والراجع يقول آح."
*-"أتاي بلا شيبة عطيه للكليبة."
*-"سعد الدابح لا وجوه تشابه لا كلاب تنابح."
*-"ربي الكلب ينفعك وربي كحل الراس يقلعك."
*-"شد كلبك قبل ما يذوق خبز الناس."
*-"الدار دار بونا وبن كلبون طردونا."
*-"السما بعيدة على انبيح لكلاب."
*-"سمن كلبك ياكلك."
*-"الكلب غير كلب وخ تكون سلسلتو من الذهب."
*-"الكلب النباح ايلا ماعض مايرتاح."
*-"الكلب كيعرف جوج حوايج نهار تخلات دار بوه أو نهار شبع."
*-"الكلبة الشهبة حتى عضاتني عاد عرفاتني."
*-"كلب السوء كيجيب الدعا لمولاه."
*-"كلب سايب أو لا سبع مربوط."
*-"بحال الكلب يخاف أو يخوف."
*-"اقطع أوذن الكلب أو دليها أو اللي فيه شي خصلة ما يخليها."
*-"آش يضر السحاب من انبيح الكلاب."
*-" ألف كلب ينبح معاك أو لا كلب ينبح عليك."
*-"الكلب ما يتشطر الا على باب دارو."
*-"بحال الكلب يحب الجوع أو الراحة."
********************************************

الـــخـــــــــــروف

*-"خروف المثقال من الـربــg يبان."
*-"شحال من خروف سبق باه للـgــرنة."
*-"شحال من خروف جا فرطاس وربى الراس."
*-"ما كيزيد بالصوف غير الخروف."
*-"حتى حولي ما ثقلوا عليه كرونو."
*-"الـgــــزار ما كيخافش من الغنم."
*-"الغنم الغنيمة فالدار الكريمة."
*-"حتى غنم ما تسرح وحدها."
*-"النعجة كتولد خروف أو الكلبة كتولدأولوف."
*-"ما يموت الديب ما تفنى الغنم."
*-" عطى الغنم للديب وgالو اسرحها."
*-"الخروف كايتربط من كرونو وبنادم كايتربط من لسانو."
*-"الكبش اللي ما عندو قرون ما يبقى وسط البهايم مغبون."

*-"خروف أكتوبر وازرع أكتوبر ايلا اتلاقاو فالـgــدرة يهرسوها
ويلا طاحو فالكرش يفرgــعوها."

*-"اللي أمو نعجة ياكلها الديب."
*-"الحولي باع باع كيقرا فالسابع."
*-" عطى الغنم للديب وgالو اسرحها."
*-"جدي ولا خروف كل واحد باه معروف."
*-"ما مضيق الزريبة الا النعجة الغريبة."
***************************************

الــذيـــب=Le loup



أمثال شعبية مغربية

*-"من عاشر الذيب يتحمل مخالبو."
*-"ما يموت الذيب ماتفنى الغنم.
*-"الذيب ما يسرح بالغنم."
*-"الذيب الكرطيط كيكرططها على الدياب كاملين."
*-"اللي قاريه الذيب حافضو السلوكي."
*-"اللي مو نعجة كا ياكلوالذيب."
*-"مَا كادير الذيبة وكيتهموا الذيب."
*-"الدار اللي ما فيها أغلال كيطمعو فيها الذياب."
*-"اللي ما كان ذيب,ياكلوه الدياب."
*-"اللهم السبع ياكلني ولا الذيب يمرمدني."
*-"كيبات ياكل مع الذيب ويصبح يبكي مع السارح."
*-"ماخص الذيب غير النديب."
*-"صلاة الذيب فالرgعة مشى يصلي نسى شحال من ركعة."
*-"ما حس الذيب غير بدموع النعجة."
*-"التالي فالذياب يعوg."
*-"الذيب حلال الديب حرام الترك حسن."
*-" قاللو :الذيب فالغنم ؟قاللو :تسنى حتى نربِّيو السلوكي."
*-"الذيب ديب وخى يطيب فالزبدة والحليب."
*-*الذيب كتدوز عليه غير مرة وحدة."
*-"كون ذيب ولاّ ياكلوك الدياب."
*-"ذرية الشيب ياكلها الذيب. "
*-"إيلا تفرقات الغنم كيسهال على الذيب باش ياكلها."
*-"آجيو يا ناس تشوفو هاد الحبيب،مشي للذيب وبغى يديرو نسيب."
*-"المرا تهرب من الشيب كيف النعجة تهرب من الذيب."
*-"الذيب كيعاود غا ما طاري ليه.
*-"معول على الذيب يسرح ليه الغنم.
*-"الذيب ماياكل من الغنم غي المفردة.
*****************************