منتديات الأستاذ التعليمية التربوية المغربية : فريق واحد لتعليم رائد

- التراث الأصيل (https://www.profvb.com/vb/f281.html)

- - أمثال شعبية مغربية مختارة-1- (https://www.profvb.com/vb/t128843.html)

أمثال شعبية مغربية مختارة-1-

أمثال شعبية مغربية مختارة-1-

*-ما تعرف العدو من الصديق غير فالشدة و الضيق
و ما يعرف الإنسان بحق حبيبو حتى يقلب عليه و ما يصيبو.

*-الحب بلا غيرة..كالخبز بلا خميرة.

*-لا تكبر الشان اللي ما عندو قيمة..يحسب راسو فلان و هو غير بهيمة.

*-شربنا من البير منين كان فيه الما زين..أما ملي كثرو فيه اليدين، خليناه غي لغسيل اليدين.

رد: أمثال شعبية مغربية مختارة-1-

أمثال ذات قيمة أخلاقية وثقافية أخي خادم المنتدى .
كم هي جميلة صيغ أمثالنا ومضامينها .
شكراً لك على الانتقاء المفيد ..

رد: أمثال شعبية مغربية مختارة-1-

*-جبيبك حبو و الشر اللي بينكم تخفيه..إذا حبك حبو أكثر..و إذا نركك لا تسال عليه.

*-بيني و بينك غير ذبحني..و قدام الناس لا تفضحني.

*-ما تقطع الواد حتى يبانو حجارو..و ما تمشي فالليل ختى يطلع نهارو..و مال تصاحب صديق حتى تعرف اخبارو.

*-واجد يعجبك من نظرة..و واحد تعجبك فيه الهضرة..و واحد كون تصب تخبطو بحجرة.

*-كلها و محاينو..و كلشي محتاج للدعاوي..كاين اللي صابر على همو..و كاين اللي فيه كثرة الشكاوي.

*-ما تعذب راسك..الهضرة فيك فيك..واخا تكسيهم و تهمر ليهم الشيك.

*-إلا تكبر عليك شي عيفة..قول ما كا يتنفخ غير الجيفة.

*-الهضرة عليك يا الحادر عينيك

*-الهضرة للسارية..و المعنى للجارية.

*-الرجل بالهمة أما اللحية راها حتى عند العتروس.

*-ما تعرف خيري..حتى تعرف غيري.

*-ضيف كل شهر خاصو ماكلة مليحة..و ضيف كل نهار خاصو شي طرخة..!

*-الذيب سول الذيبة:" قالها واش أنا فيا سي عيب؟"
ضحكت فخاطرها،حذرت عينيها و سكتات..و ملي طال سكاتها..قاليها:
"غير قولي عليك الامان."
قالت لو:" العيب اللي فيك، ما قيك أمان."

*-اللهم النعاس فالخلا.. و لا ضيافة البخلا
اللهم النعاي قالبرد..و لا ضيفة القرد.

*-ما يقرا همك غير المهموم..و ما يعرف غرامك غير المغروم.

رد: أمثال شعبية مغربية مختارة-1-

حكم و نصائح و حكم من التراث الشعبي الجميل
شكرا جزيلا

رد: أمثال شعبية مغربية مختارة-1-

*-زين الوجه كا يزول..و زين العقل كا يطول..و اللي خاف زينو يذابل يسقيه بالمعقول.

*-الدنيا مكثوبة بالدفال..الريح اللي جا يديها..بنادم شحال جمع ثروة و أموال..و gـــــاع اللي جمعها غادي يمشي و يخليها.

*-البصلة غمرها ما تولي تفاحة..و الرخيص ما تبان فيه ملاحة..و ناس هاذ الزمان ما تفيد معاهوم غير القباحة.

*-خير الماكلة ما حضر..و خير اللبسة ما ستر.

*-الله ينجيك من الساكت إيلا دوا.. و من الغدار إيلا نوا..و من الجيب إيلا خوا..و من الصداه إيلا قوا..و من الشيطان إيلا قوا.

*-رضينا بالهم و الهم ما رضا بينا..درناه عند راسنا صبح عند رجاينا.

*-العين صعيبة،تقتل الكسيبة و تخوي الزريبة،الله لا يسلطها على شي حبيب أو حبيبة.

*-اللي حبك حبو و لقلبك حوزو..و اللي جفاك جفيه و نعداه و دوزو.

*-كاين اللي عندو جوابو فمو..و كاين اللي داسو فكمو..كاين اللي حتى يشاور مو.

*-سرك خفيه، و فقلب أعماقك خبيه..إيلا عاودتيع لحبيبك يعاودو لحبيبو..تولي فين ما تمشي تصيبو.

*-اخدم على روحك و دير غشيشة..لا تنفعك لا فاطمة و لا عيشة.

*-إذا حلفو فيك النسا.. بات فايق و دير العسا.

*-الميت ما يقوم..و الصاحب ما يدوم..و قليل الأصل ما عليه لوم.

*-الدنيا قش فقش..و اللي يتنفخ يتفش.

*-دير الخير و ارميه فالبحر الجاري..إذا ضاع عند العبد، ما يضيع عند الباري.

*-اخدم يا صغري لكبري، و اخدم يا كبيري لقبري.

رد: أمثال شعبية مغربية مختارة-1-

*-إيلا بغيتي توحش صاحبك سـلــفـــو.

*-خوكم درويش..يتمشى غي جنب الحيط..الله لا يعطينا شي مــراعزيز عليها السريط..و شي نسيبة تموت على اللغيط..و الله يبعد علينا تريكة المساخيط.

*-اللي بغا ولدو يخرج زين..يعلمو الصلاة و الدين.

*-حرنا فاللي حبونا..أما اللي كرهونا داروا فينا خير..

*-إيلا شدك الزمان بنيابو..ما يفكك لا مولاي إبراهيم لا حبابو.

*-الزين بحروفو..ديه لمو تشوفو..القرع بفلوسو.. آرا داك الراس نبوسو.

*-لا يغرك زين الوجه فالمرايا..اللي ينفع هو زين القلوب و الصفا و النوايا.

*-غنينا لهوم باش يفهمونا.. هزو طعارجهوم و تبعونا.

*-امدح صاحبك مع الناس..و لومو الراس فالراس.

*-الكلمة من عند الرخيص..ما توعوع ما تقيس..و من عند الغالي..تسهر الليالي.

*-اللهم الخبز البايت و لا سفنج الشمايت.

*-اللي حبك ما بنى ليك قصر.. و اللي كرهك ماحفر ليك قبر.

*-ما تبكيش على اللي يكرهوك..ابكي على جسبتيهوم أحباب و غدروك..و فوقت الشدة باعوك..نكروا العشرة و خانوك.

*-إيلا شفتيهوم رضاوا علينا..عرف حاجتهوم فينا..لو ما بان ليهوم فينا..كون خلاوا الواد يدينا.

*-اللي تربات على يدين الرجال..ما يهمها لا زين و لا مال.

*-تفهمني ..نفهمك،تغدرني.. ندمك.

*-ناس فضة و ناس نحاس .. ناس ذهب و ناس ألماس..و ناس كيف التاج على الراس..و ناس تحت الساقين تنداس..ناس كيف الملائكة و ناس كيف الوسواس الخناس.

*-ياكل و يشرب..و فوقت الحاجة يهرب.

*-جيت نغربل فصحابي..بقى لي غير الغربال.

رد: أمثال شعبية مغربية مختارة-1-