منتديات الأستاذ التعليمية التربوية المغربية : فريق واحد لتعليم رائد

Tudrt

Tga tazzit tut nn gh tasa inu

S ma ad tntl ar tmrrat ul inu

Jligh gis ur ssngh mad watsgh

taḍṣa tawda nghd tikssaḍ

inna tumẓt ha nn tfak i tillas

ur ar tmmala amr isnnan nns

aḥ inu nkkin ingḍn gh isaffn nns

izikr nna gh ttghiḥ gin iyi taqayt

tudrt ad immagh yan f ma ad iṭaf

f wakal d tusna d warraw nns

igh ur illa watig mqqar tccit timimin

tighzi n uzmz ad ak tnt immaln

tskr abzg n twala tgr gis tifilit

tanna izrin tfl iyi d timitar

Ur jligh
Nnan iyi tjlit
Ma n tagharast ad gh tllit ?
Mad trit ?
Mad tsiggilt?
Idl waggʷu iwttasn nnk
Nxabbaln ak ifalan
Tzdit ixf nnk d waṭṭan
Tbidt f tillas d tkrkas
Tgit tudrt nnk gh iskraf
Ur jligh tifawt a yad gh lligh
S aynna mu ufiv rad srs tlligh
Aswingm ur d s unckna s as tsurfm
Nkki ar siggilgh tayri n ils
Ur ssngh tawda ula tikṣṣaḍ

Askrf n ils
ar swingimv irigh ad sawlgh
yagi ils ad immas ad yini ma illan
annigh igdad d idrarn ar giti sghaln
ssnn is iḥḍa ul inu aṭṭan
gawrgh ar asmiṭṭiwv iliḥ afssay
max a ils tugit ad tsawlt?
Ha nn nkki ad iccan akuṛay
Askrf inu iskr t tuggt n waṭṭan
Lligh gh igʷẓaẓn iligh gh irafan
Laḥ iyi taḍfi ḥrran iyi ussan
Afgh nn afssa iga iyi asafar

Gar gayyu
Agayyu inu ad ditun sawlgh

Ad dik nẓi ad iyi turrit

Ul inu yat ad giti ivaman

L3aql lli dari ur illin

Asif nna d illan yawi t

illi ur nra ad iyi tsakan

Kra sa ntimvur ar nsnuful

Gar gayyu gar tal3aqlt

ṛmin ighʷrad lli f tllit

ula amgrd ar ismummuy

acku yusi agayyu inufln

ils inu ssn mad ttinit

ad k ur bbijn uxsan nnk

iẓṛi inu taddat i waln nnk

id gar ura gisn smuqlgh

amẓẓugh inu balak ṛuḥat

kda n tkrkas a mu tsllam

ifassn lli darngh illan

ad myawsn ad ifaw imal

aḍaṛ inu ha nn iṛwa as

ad ur izrb illa usnnan

iggut ẓlg llan waman

igh iṛẓa wafud ur agh asin

Amzruy
Ar saqsagh mad iga

Mani iwala?

Max lligh illa?

Nnan: tamrarut trxa tcqqa

Immudda usqsi inu

Ur ifl mani ur ikka

Tabrat yat ad tga

Ar ittara kra iẓṛa

Izmmim kra yufa

Ar ittighʷẓin gh kra inna

Igh nn yitti gar afus f ma yura

Skr, ngh ur tskrt

Ini, ngh ur tnnit

Ighʷẓin ngh tskarkst…

Amzruy kra ikka illa

Aynna illan ifuk ad t inna