قصة حياة بغريرة | فطيمة المراكشية - منتديات الأستاذ التعليمية التربوية المغربية : فريق واحد لتعليم رائد

2013-06-28, 00:30

رقم المشاركة : 1

فطيمة المراكشية

أستـــــاذ(ة) مــــاسي

إحصائية العضو

فطيمة المراكشية غير متواجد حالياً

قصة حياة بغريرة | فطيمة المراكشية

بسم الله الرحمن الرحيم

حكاية بغريرة

أنا بغريرة ولدت بين الفيافي والوديان قبل سنين وأعوام

بعمل الفلاح من أمي الأرض وأبي المطر بإرادة الواحد القهار

وجهي كالقمر إن اكتمل .. وطعمي لذيذ لا يقاوم

فالقرية .. فدوّار موحا وسعيد .. وفـ دار خالتي أم العيد ..

خالتي الأخرى .. في الحلّاب عجنتني

بيديها الكحلة بالحناني .. خالتي حادة بالمهل خلطاتني ..

من الدقيق والسميد والحليب .. والخمّار وجدتني ..

فـ ميكة كحلة رزماتني ..وفالكاميلة من البرد غطّاتني ..

وجنب الكانون فالكشّينة رقّداتني ..

- وقت الفطور تاع العشرة .. تّي نوضي خبزي الفطور يا زهرة

- شعلي الكانون تاع العواد وديري فيه اللّوكيد وشي جدرة

- باش تبقى العافية شادّة الجمر .. راه قتلتنا البرودة والسمرة

إوى حطّااات زهرة الطاجين تاع التراب فوق مناصب الكانون

ودهناتو بالزيت غير بالقياس والقانون

وهزاتني بمغرفة د العود وخا مهرسة .. راه كبيرة وملسة

وسرحاتني فالطاجين خو القدور .. كي رقّاص المكانة إلا تايدّور

- ها الفطور موجود يا مّالين الدار ..

- واآآا خيرة .. رشّي المراح شطبيه وفرشي الحصيرة

- وحطي الميدة .. وعيّطي لرابحة وبناتها .. وخالتي الكبيرة

- سعيدة .. حطّي المقراج على الفاخر .. والبراد والكيسان فالصينيّة

تجمعو الوليدات والبنات والعيالات

وحطوني فطاجين السلاوي .. وحداية الخبز والملاوي

والمقراج تيغلي .. ومن فمّو السبولة خارجة طالعة وتعلّي ..

زبيدة .. قربي ليا قلّوش السمن .. وبيدو تاع زيت العود وسطيلة د العسل ..

وأنا البغريرة الزوينة البيضة والمسيريرة ..

أم عوينات منها الكبيرة والصغيرة ..

فرغَت عليا مّي زهرة التغميسة حتى غرقت بحال الرفيسة

ولّيت بعويناتي ساكتة وكنشوف ..

كي شي سكيطة تاع الخروف

بسم الله ألبنات .. كولو يا العيالات

وانتما يا الوليدات .. الكبار وللي ما عندو سنينات

كولو وعمرو بيا الكريشات

- زهرة .. مال ولدك ما بغا يبرا ؟ ومال كمّارتو ديما صفرا ؟

- غي سكتي على هاذ القهرة .. قالت الفرّاكة ضارباه الصرّة

- ويلي على السرّة ؟ ّ

دّيه لسّي موحا يبخّ عليه وبيخر ليه بعين تيقليت الحمرا

وسيري زوْريه لالة كركابة وكتبي ليه عند مول الفال والحضرة

- وااا عيطونة .. مالكي مقابلة غير النكير والهضرة

- نوضي شدّي ولدك راه بغات تنطحو البقرة

وأنا البغريرة غرام المّوحمة والنفاس ..

غير بشوية كنذوب بين اللّقامي والضّراس ..

هاالطاجين خوى وباقي غير الخبز فالطبيقة مغطّي بالكرّاص

راه ماشي كيعرفوني غير ناس الدشر والعروبية

حتى فـ الديور الكبار والصغار فالمدينة

غير بدلو حلّاب العجية وعجنوني فمولينيكس الماكينة

وخمروني فالغضارة .. ولّا يغطِّوْني فالكاسرونة

ويخبزوني فتيفال فوق البوطة بحال العروسة المرهونة

وياكلوني فطبسيل الطاوس بالزبدة والكوفيتير مدهونة

الولاد ياكلوني بالفرشيطة والموس .. ومولات الدار مع الماعن مشطونة

إوى سمعو غدايدي مع قوم بنو سام ..

فرنسا والماريكان والنمسا وحتى كندا كيبيك

كنت فبلادي المغرب سميتي للاة بغريرة ودابا أنا مدام بانكيك

من السوبر مارشي جابوني فالباكيا ..

ندبي عليا ودري ليا العزا .. يا خالتي الشبّاكيا

خلطوني بالزربة فزلافة تاع الشلاظة والكيك

وخبزوني فمقلاة الضّو .. بلا بنّة وكنجي كي لاستيك

على وجهي قلبوني فطبسيل الميكا ..

وكبّوا عليا الشكلاط والشيرا بحال إلا أنا كيكة

بقيت غي كنشوف ونتعجّب .. أأ مالهم كياكلوني بالمقلوب ؟

إوى راه قوم سام .. طوْرُو كلشي .. حتى بغرير والطعام

ورااااه ضاعت قيمتي الشكلية وحتى الغذائية

كنت فأصالتي خنشة الطحين وليت نتباع فالباكيا

على أختكم البغريرة .. غير قراو وبكيوْ عليا ..

وسمحو ليا يا سكان الأرض المغربية

أش تقولو فهاذ القضيّة ؟

إلا ما عجباتكم جريوْ عليا ..

حتى يعواجو ركابيّا ..

هنا كتبتُ هذه القصة البغريرية

لأعضاء الأستاذ في أرضنا المغربية

تقبّلوها من أختكم في الله فطيمة المراكشية

من بلادنا الحبيبة المملكة المغربية

ـــــــــــــــــــــــــــــــ

: منتديات الأستاذ التعليمية التربوية المغربية : فريق واحد لتعليم رائد https://www.profvb.com/vb/showthread.php?p=657311

التوقيع

2013-06-28, 09:55

رقم المشاركة : 2

ام ادريس

مراقبة عامة

إحصائية العضو

ام ادريس غير متواجد حالياً

رد: قصة حياة بغريرة | فطيمة المراكشية

قصيدتك راقتني جدا

هديتك مني طبسيل د بغرير مغربي

وقلوشة السمن وأخرى د العسل

بالصحة والعافية

التوقيع

2013-06-28, 10:24

رقم المشاركة : 3

فطيمة المراكشية

أستـــــاذ(ة) مــــاسي

إحصائية العضو

فطيمة المراكشية غير متواجد حالياً

رد: قصة حياة بغريرة | فطيمة المراكشية

أم إدريس

جمعة مباركة

أنا من عشااااق البرغرير فهو حاضر في وجباتي بكثرة
واليوم لن آنام حتى آكل منه طبسيلا مدهونا وبعسل وزبدة

شكرا على الهدية والمرور الطيب

التوقيع

2013-06-28, 19:07

رقم المشاركة : 4

نزيه لحسن

بروفســــــــور

إحصائية العضو

نزيه لحسن غير متواجد حالياً

رد: قصة حياة بغريرة | فطيمة المراكشية

مجهود إبداعي قيم جدا ، و يتناول موضوعا استثنائيا ، يخص أكلة من فصيلة المخمرات العجينية .

وقد ظهر مدى حب المبدعة لهذا النوع من الفطائر المدهونة من خلال براعتها و هي تصفه بأجمل الأوصاف و أحسن النعوت ...

مع وافر العافية ، وأنت تقبلين على مائدة البغرير ... أما أنا فلا أستحسنه ، ولكن لا أكر تواجده فوق مائدة الأسرة الصغيرة و العائلة و الأطفال و الضيوف .

بالصحة و الراحة .

التوقيع

2013-06-28, 19:42

رقم المشاركة : 5

أم الوليد

بروفســــــــور

إحصائية العضو

أم الوليد غير متواجد حالياً

رد: قصة حياة بغريرة | فطيمة المراكشية

ما أروع هذه الحكاية البغريرية التي بدأت من دوّار موحا وسعيد
وانطلقت إلى غاية النمسا ،فرنسا و كيبيك..

أعجبتني جدا المصطلحات المغربية التي استعملتيها في كتابتك والتفاصيل الدقيقة جداً التي تطرقت لها في سردك..

سلمتِ وسلم إبداع قلمك الرائعة فطيمة المراكشية

التوقيع


	للتوصل بجديد الموقع أدخل بريدك الإلكتروني ثم فعل اشتراكك من علبة رسائلك :