هههههههههه موضوع رائع ومضحك بارك الله فيك
ضحكتيني خصوصا على لالة لحمارة والطموبيل قاسم مشترك بصراحة ههههههههههههه

هههههههههههههههههههههههه

الله يسمعنا خبار الخييييير هاد النهار ف المواضيع ليغادييييير دابا

ماخليتي ليا حتا باش نعاونك و لكن معاندي مانقووووووول

رااااااااك مسالي أسي مصطفى ههههههه

الموضوع الواحد و العشرون: المنتخب الوطني : ياك الاسود أنقرضات ، آجيو نديرو حمير الأطلس !

قاليك المنتخب الوطني !! والله ما تيحشمو، وجوهم مقزدرة ، انا بعدا ما عمري شفت شي منتخب وطني كل لعّابْ فيه تيهدر بلغة ، هالبرطقيزية ، هالدنماركية ، هالهولاندية ، هالفرنساوية ، هالسباليونية ، إيوا هذا راه ولاّ منتخب " بقية العالم " ، ماشي المنتخب المغربي ، شوفوا غير ف النشيد الوطني ، وَ غير كتبدا الفرقة النحاسية ف تقرقيب الجوالق دياولها، كيبداو السبوعة مساكن ف نديغ المسكة حيث حتى واحد فيهم ما حافظو ، انا بغيت نعرف حاجة وحدة غير ملي تيكونوا ف الملعب كيفاش كيتواصلو مع بعضياتهم ؟ و كيفاش تيقدر يشرح ليهم المدرب الخطة ديالو ، وايلي زعما غادي يكون تيهدر بكاع اللغات ديال اللعابة اللي ف المنتخب ، ما نظنش !! ، و حتى ملي تيسجلو شي بيت تيبانو كل واحد كيفرح بلُغتو ما كيفرحوش بلغة وحدة ، و هذا طبيعي حيث ما زايدينش وما كابرينش ف المغريب ، وحتى ملي تيخسرو ما تيبانش عليهم شي أسى ولا شي حزن كبير، تيبانو ليك بحال يلا مقلقين غير على البريمات دياولهم ، اما النتيجة ما يهمش كل واحد داير والْـكمان ولا " إم بي طروا" ف وذنيه وما مسوقش خوك ما راهش هنا. و موت أنت بالفقصة يا الجيلالي.

الحمير ديال بصح ذات الدم المغربي الاصيل عيات مسكينة ما تنهق من بعد نكبة غانا بغينا الزاكي بغينا الزاكي بغينا الزاكي ، ولكن لكيادر ديال الجامعة دارو براسهم بحال يلا ما تيسمعوش ومشاو جابو فرنساوي من بعد ما كانوا اقالو فرنساوي واحد آخر.ودبا من بعد نكبة الغابون والهزيمة النكراء للمنتخب تشاورو مع بعضيتهم وقالو آجي آش نديرو ما نديرو ، نخرجو من سفينة سيدنا نوح ونخليو اللي بغا يغرق..يغرق و الله لا يفكو.
واش تيصحابليهم حنا غير حمير وصافي را ما تنفهمو والو ، زعما بغاو يقولبونا ، و حنا راه عارفين وعايقين بالخطة الإبليسية ديالهم ، علاه شكون اللي تيقدر يشوف الشياطين من غير لحمير !!! القضية وما فيها ان الجنرال اشارو ليه لمشاورية دياولو و فتاو عليه واحد الراي ، قالو ليه السفينة غارقة غارقة ما كاين امل احسن حل هو نديرو جمع عام وما ترشحش باش فاش يخسر المنتخب مع الكاميرون ما يلقاو الحمير المغاربة ف شكون يشدو ولا شكون يلومو ، وحتى يلا بغاو يلومو الفاسي الفهري غادي يقوليهم انا عاد جيت ، هادي مخلفات بن سليمان ، ولكن دابا تنواعدكم بالاصلاحات و ان شاء الله من هنا لـ 2025 نجيبو كاس العالم. " إيوا تسناو الزبدة من حليب الكْرَم "
المشكلة ماشي ف الجامعة ولا ف المدرب ، المشكلة الكبرى هي غياب الحس الوطني ، ماشي غير ف الرياضة ولا الكورة ولكن ف كاع الميادين ، والكيادر اللي شادين المسؤوليات يـَشْحَجُونَ بلغات ليست مغربية وقلوبهم تخفق لأعلام غير العلم الاحمر ذو النجمة الخماسية الخضراء .
أنظرو معي المفارقة ، في الماضي كان الرومان ينقلون الأسود من شمال إفريقيا إلى روما بأقفاص مغلقة تماما و يسجنونها لأيام عديدة بلا طعام لتصبح أكثر شراسة ومن ثم يطلقونها على المجالدين و المجرمين المحكوم عليهم بالإعدام ، ودبا اصبح العكس قاليك ولاو تيجيبو اسود الاطلس من اوروبا والبلدان الباردة وتيعلفوها مزيان سوا بالقص سوا بالحبة ، باش كتولي عندهم الطراوة البدنية والليونة الأنثوية. كون غير دارو خير وبدلو الرمز ديال الاسد بالحمار.
ولا كون يسعفونا كون يجيبو غير اللعابة ديال فرق الاحياء و لا الهواة ولا البطولة الوطنية ، و يديرو ليهم شي مدرب مغربي على قد الحال وبلا مضيعة ديال فلوس الشعب ، و هانية ديك الساعة واخا يخسرو ما يبقاش فينا الحال ، المهم غادي نكونوا عارفين بلي هادوك فراقشنا اللي خسروا ماشي فراقش بابا نويل ، وكيف تيقول المثل اللي ضرباتو يدو ما يقول آح..والله ما نقولو آح..

الموضوع الثاني و العشرون: حماركوم ف كرواتيا

اشتهر زمن عيسى ابن مريم (عليه السلام) بالبراعة في الطب فجاءت المعجزة المؤيدة للسيد المسيح هي «االقدرة على مشافاة الناس».وسُمي عيسى ابن مريم بالمسيح كما يقول بعض المفسرين لأنه كان لا يمسح ذا عاهة الا برئ منها فسمى «مسيحاً».وجاء في سورة آل عمران الآية 49 «وابرئ الأكمه والابرص وأحيي الموتى بإذن الله...». وجاء في سورة المائدة الآية 110 «... وتبرئ الأكمة والابرص بإذني واذ تخرج الموتى بإذن الله».، هذه كلها نصوص صريحة تؤكد أن العبد الوحيد الذي خصه الله بقدرة مشافاة الناس بواسطة المسح ومنحه القدرة على إبراء الأعمى والأبرص و إحياء الموتى فقط باللمس هو نبي الله ورسوله عيسى بن مريم ، ولم يأتي بعده أحد خصه الله بهاته المعجزات ، لتقتصر بعد ذلك عملية المشافاة و الإحياء عبر "كن فيكون" على الله تعالى ، كما في قصة حمار العزير التي نقلها لنا القرآن الكريم إذ قال تعالى فى سورة" البقرة"(أَوْ كَالَّذِي مَرَّ عَلَى قَرْيَةٍ وَهِيَ خَاوِيَةٌ عَلَى عُرُوشِهَا قَالَ أَنَّى يُحْيِي هَذِهِ اللَّهُ بَعْدَ مَوْتِهَا فَأَمَاتَهُ اللَّهُ مِئَةَ عَامٍ ثُمَّ بَعَثَهُ قَالَ كَمْ لَبِثْتَ قَالَ لَبِثْتُ يَوْمًا أَوْ بَعْضَ يَوْمٍ قَالَ بَلْ لَبِثْتَ مِئَةَ عَامٍ فَانْظُرْ إِلَى طَعَامِكَ وَشَرَابِكَ لَمْ يَتَسَنَّهْ وَانْظُرْ إِلَى حِمَارِكَ وَلِنَجْعَلَكَ آَيَةً لِلنَّاسِ وَانْظُرْ إِلَى الْعِظَامِ كَيْفَ نُنْشِزُهَا ثُمَّ نَكْسُوهَا لَحْمًا فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَى كُلِّ شَيْءٍ قَدِيرٌ (259) )) و أن عزير بعدما سيحييه الله بعد مماته ليريه آية إحياء الموتى فيه أولا ثم في حماره الذي سيجده قد بليت عظامه وصارت نخرة. فنادى الملك عظام الحمار فأجابت وأقبلت من كل ناحية حتى ركبه الملك وعزير ينظر إليه ثم ألبسها العروق والعصب ثم كساها اللحم ثم أنبت عليها الجلد والشعر، ثم نفخ فيه الملك فقام الحمار رافعاً رأسه وأذنيه إلى السماء ناهقاً يظن القيامة قد قامت.
فذلك قوله {وَانظُرْ إِلَى حِمَارِكَ وَلِنَجْعَلَكَ آيَةً لِلنَّاسِ وَانظُرْ إِلَى الْعِظَامِ كَيْفَ نُنشِزُهَا ثُمَّ نَكْسُوهَا لَحْماً} يعني وانظر إلى عظام حمارك كيف يركب بعضها بعضاً في أوصالها حتى إذا صارت عظاماً مصوراً حماراً بلا لحم، ثم انظر كيف نكسوها لحماً {فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَى كُلِّ شَيْءٍ قَدِيرٌ} من إحياء الموتى وغيره.وذهب بعدها على حماره إلى بيت سيدة عجوز كان يقطن بجانبها قبل مئة عام وأخبرها انه عزير وانه مات واحياه الله فعرفت انه من الصالحين وطلبت ان يدعو لها الله ليرجع بصرها فدعى لها الله ومسح على عينيها فرجع إليها بصرها بإذن الله.
كل هذه المعجزات والظواهر إذن تؤكد بجلاء أن من يمتلك مثل هاته المعجزات يجب أن يكون نبياً رسولاً أو صالحاً من الصالحين و أنها معجزات لم يختص بها الله أحداً عبثا و إنما كانت تحديا منه جل جلاله بظروف خاصة و أحداث معينة ، ماشي بحال ظروف الصخيرات الشهيرة بإنقلاب 1972 واللي من بعد 34 سنة عليه غادي يبان السي المكي الذي يزعم أن سيدي ربي أعاره قدرته الإلهية و أعطاه تفويضاً موسعاً ليشفي الناس نيابة عنه وماشي غير بإذنه بل ليقوم مقامه ، السي المكي قاليك ما كيطلب فلوس غير قرعة ديال سيدي علي بـ 6 دراهم و قالب ديال السكر بـ 15 درهم ، وتيقول أنه كيستقبل عشرآلاف ديال البشر ف اليوم ، إيوا يلا عندك مع الماط ضربو 21 درهم فـ * 10.000 وشوفو شحال غادية تعطيكم 210.000 درهم ، يعني ما يعادل 21 مليون ديال السنتيم تيدخلها ف النهار مستغلاً جهل الناس وغباءهم ، وهذا يعني أن السي المكي يلا مشى على هاد المنوال غير عام واحد غادي يكون بإمكانوا يأسس شركة مختصة بقالب السكر و المياه المعدنية ، السي المكي ما كيداوي ما والو ، كل ما هنالك أنه طاح لينا على الجرح وقال هاد المغاربة غير حمير آجي نركب عليهم راهم يوصلوني فين باغي ، حيث أغلب المغاربة مراض و تيعانيو نفسياً وعندهم الإستعداد لتقبل أي شيء ، و هناك شيئ إسمه العقل الباطن والاستعداد النفسي للعلاج .. فاذا صدق عقلك الباطن انك ستعالج على يد هذا الشخص فأكيد انك ستعالج ليس لان هذا الشخص عنده بركة وانما لأن عقلك قد آمن به ، هاته الطريقة ليست جديدة فايت بزاف ديال الاطباء إستعملوها وباقين كيستعملوها مع المرضى ديالهم ، كيجي الطبيب عند لمريض تيقوليه شوف غادي نعطيك واحد الدوا غادي يداويك خلال 24 ساعة، أو صافي العقل الباطن ديال المريض كيتقبل الفكرة وبسرعة كيصبح كيعتقد بداك الدواء وكياخدو وفعلا تيبرا وكيتشافى و غالبا تيكون داك الدوا عبارة عن حبة اسبرين او دواء عادي ولكن الاعتقاد القبلي والاستعداد القبلي هو القوة الكامنة بداخل كل حمار منا تجعلنا ننجح حينما نعتقد ونؤمن ونثق..بأنفسنا طبعا لا بالشيخ المكي، الذي شاهدت له فيديو مؤخراً بكرواتيا عندما كنت هناك لحضور مؤتمر خاص بحمير جنوب أوروبا ، السي المكي ما قدوهش لمغاربة وقاليك شاف رؤية ووقف عليه منادي ف منامو قاليه السي المكي يا المتكي هز عكازك وعليه وكـّي و شق بيه لبحر ودوز أنت وصحبك فأنت من المرسلين ، المرسلين إلى جهنم ولا شك ، طبعا هناك احد الاذكياء الصرب هو الذي إتصل بالسي المكي بعدما قام بدعاية موسعة له بكرواتيا و اتفق معاه باش يمشي لكرواتيا و بشره بالعالمية وقاليه راك غادي تدخل لعالم الشهرة من اوسع ابوابه ، على اساس انه ياكل ويوكلو معاه ، وبدا السي المكي تيعبز ف الحمارات والحمير الكرواتيين ، وكرواتيا و ياللأسف بلد جميل جدا وهادئ لولا قبح السي المكي اللي مشى يزيد يشوهنا ف كرواتيا اكثر ما احنا مشوهين ، مشى يمثل بلادنا ؟ بالخرافات والخزعبلات وبلا حشمى بلا حيا قاليهم تماك أنه تيعالج كلشي من بما في ذلك السيدا والسرطان ، إيوا هذا سيدنا عيسى ولاّ ماشي غير المكي الترابي..الصراحة والشهادة لله هو فعلا يستحق كرواتيا ولكن ماشي كرواتيا الدولة ـ وإنما بوليس كرواتيا الذين إنقرضو قبل سنتين كون كانوا باقين كانوا هما اللي يصلاحو ليه يجيو يهزو والديه ف صطافيطات ديال الكات كات زرقين ويديوه يزرقو ليه داك لوجه الماسخ ودوك لعينين لمدليين..كون كان الخوخ يداوي..لخبار ف حماركوم