نص زجلي

مبلي بيك

زجل: عبده بن خالي

وَحَقْ الْحَرْف الْوَڭَّادْ
فِ جُوفْ لَيامْ
الْبالْيانِي بِيكْ
مَانَا مَفْروقْ عْلِيكْ
مَانَتْوَخَّرْ
وَنْدِيرْ000
مَنْ كَلْمَةْ لَمْعَانِي
وَخْطُوطْ الْڭَصْبَه
فَ عْيُوطْ الْحَصْبَه
قَنْدِيلْ مَنْ رَاسِي
سَرْبَه وَلاَّفَه
تَمْحِي لَخْرَافَه
تْزَغْرَتْ فَ الرِّيحْ
بَ الصُّوتْ الْمَلْمُومْ000
فَ الرُّوحْ
تْعَانَدْ لَمَّاجْ
وَٱعْتُوبْ الشَّوَافَه
تَكْتبْ لِيكْ وَ عْلِيكْ
بَرْوالْ
أُوشَلا َّحَرْكَاتْ
مَنْ مَحْنَةْ لَقْصَايَدْ
فَ ٱبْهُوتْ الْوَقْت
وَالشُّوفْ الْڭَاسِي
تْنـــَادِي000
بِ ٱنْسَايَمْ لَفْجَرْ
تْعَيَّطْ عْلِيكْ
وَالڭَانَه بِيكْ تَتْحَرَّرْ
وَحَقْ رِيقْ لَمْدَادْ
بِينْ لْسَانِي
وَعْرُوڭْ لَعْمَرْ
بَــاغِي نَهْضَرْ
مَــالْڭِيتْ لِيكْ مَبْدَا
غِيرْ000
مْسَارَبْ مَفْجُوعَه
وَعْڭَارَبْ مَزْرُوعَه
فَ ٱطْرِيڭِي000
كِيفْ الْحَمَّه
بِينْ ضْلُوعِي تَڭْدَا
وَتْعَرْبَطْ
وَجْعَه تَغْبَرْ
وَجْعَه تَحْضَرْ
وَالصَهْد الْمَخْدُومْ
شُومْ000
يَخْنڭْ لَڭْليبْ
وِيعَرَّسْ بَسْمُومْ
تْوَاطِي000
لَحْرُوفْ ، تتْبَعْثَرْ
وَحَقْ الْعَاهَدْ بِينَاتْنَا
فَ الشَّطْ الْبَحْرِي
مَانِي مَدْهِي
مَانِي مَلْهِي
غِيرْ لَكْلاَمْ000
فَ مْجــَاجِي
بَاقِي عَزْرِي
بَاغِي بِيكْ000
يَتْجَوَّجْ
وِيْكُونْ لِيكْ
سَــالَفْ لَعْمَرْ
فَاهَمْ لَمْقَالْ
أُوسَرْ لَمْعَـــانِي
قـَـارِي فَ اللُّوحْ
فْتُوحْ السَّلْكَه
وَسْرُوتْ الْحَرْكَه
يْمُوتْ عْلِيكْ
وِيْعِيشْ يَتْرَجَّى
هَاذْ الدَّنْيَا تَسْقِيهْ
مَنْ لْهِيبْ الشَّمْعَه
فِي عَزْ اللِّيلْ
نَغْمَه طَبَّاعَه
تْسَرَّجْ الْخِيلْ
فَ بْيَاضْ الْوَرْقَه
وَ تْجِي فَ الْخَاطَرْ
زِينَه مَسْرَارَة
تْفُوسَخْ لَكْتَابْ
وَتْحَلْ000
عُڭْدَةْ لَهْمُومْ
فَ ثْقَافْ الْهَضْرَة
أُوضِيمْ الْمَسْكُوتْ
اِدُوزْ الْعَثْرَة
يَتْقَوَّى فَ الرِّيحْ
نَجْمَة حَضَّارَة
فْ لَعْلاَلِي تَتْكَوَّرْ
وَحَقْ رِيحَتْ لَبْلاَدْ
وَوْجَعْ000
لَمِّيمَه فْ لَفْجَرْ
أُودِيكْ الْكَلْمَه
الفَـاڭْيَا بْ لَمْعَانِي
مَانِي هَانِي
مَانِي صَابَرْ
حَتَّى نَجْمَعْ000
مَنْ حْرُوفْ الجُوفْ
مَشْمُومْ000
بْ لَعْشَقْ مَلْمُومْ
يَبْنِي لِيكْ
مَنْ ذَاتِي ٱوْكَرْ
يَطْلَعْ000
فَ الرَّاسْ مْنَشْوِي
بَ الْعَزْ يَتْشَمَّرْ
وَحَقْ دِيكْ الْحَصْبَه
وَكْرَيْدَةْ لَعْيُوطْ
فْ حَرْكَة لَعْبَادِي
حَتَّى نَبْدَا
بْهَاذْ الْحَبَّه
وَنْزِيدْ الْڭُدَّامْ
تْبَانِي000
فَ سْمَاياَ ڭَمْرَة
عَلاَّمْ000
مَ لَّكْلاَمْ
مْسَرَّجْ لَهْمُومْ
فَ قْصِيدَة لَيَّامْ
الْبَالْيَانِي بِيكْ
طُولْ لَعْمَرْ
حَادَّة000
يَاحَادَّة
ٱنْتِ وَ النَّخْلَه000
مْڭَادَّة
أُوهَاذْ السَّالَفْ000
دْوَالِي
دَارَتْ تْوَالِي
جْنَانْ000
فَ الرُّوحْ مْنَوَّرْ 0