منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

السلام عليكم إخواني وأخواتي متتبعي مذكراتي السابقة بالدارجة المغربية ، سواء التي تخص بداياتي في العالم القروي أو التي تهم قرابة 23 سنة من العمل في العالم الحضري بمدينة تاوريرت.
في الحقيقة كنت قررت أن لا أكتب مذكراتي الجديدة بعد انتقالي الى ضواحي وجدة حتى انتقل من هناك ؛ ولكن يظهر أن الإقامة أضحت في سنتها العاشرة وما زالت الوضعية كما هي.لهاذا قلت في نفسي . " علاش ما نكتب على هاد العشر سنوات سيما وأن 3600 يوم غنية بالأحداث ؟ فعلا غادي نكتب الحلقات ابتداء من هاد الليلة .بالطبع كي العادة غادي تكون بالمباشر حيت خوكم الحوميدي ما عندوش مع الكتابة والنقل ههههههه
قبل ما ندخلو للموضوع بغيتكوم تعاودو تقراو الخاتمة اللي كتبت في مذكرات معلم في العالم الحضري

انتهت مذكرات حوميدي في العالم الحضري.دابا حوميدي كيشتاغل في مجموعة مدرسية كتبعد على وجدة ب34 كيلومتر .كل صباح من غير السبت والأحد كيمشي يخدم ويرجع مع الجوج و30 دقيقة.فالبادية كاين كي العادة التكرفيصْ وخاصة حيت كنت آخر من التحق عانيت تقريبا جوج ديال السنوات فواحد الفرعية فيها البيسْتْ وكان عندي مشاكل مع السكان ومع المدير

هاديك قصة أخرى ، شي عام نْعاودها ليكوم بْحالْ الحجاية ، شي عام إما نْكون خْديتْ التقاعد ديالي أو نكون انتاقلت لمدينة وجدة.
على كل حال ، خوكم الحوميدي دائما عضو نشيط وكيخدم بْنيْتو والحمد لله فهاد الساعة راها عندو شْحالْ من مسؤولية كيْقوم بيها بدون أن يقول (أحْ) أو يشْكي كما يفعل المعلمون مين تكترْ عليهوم الخدمة

الحلقة الأولى : الزيارة الأولى لمجموعة مدارس عبد الرحمان الداخل

أول مرة في حياتي كنت ننتظر الدخول المدرسي بفارغ الصبر.تصورو كنت باغي نعرف الموقع ديال هاد المدرسةوالفرعيات اللي تابعاليها.بالطبع واخا نمشي ليها راها سادّة حيت العطلة .لهادا كان علي نصبر حتى لبداية شتنبر.
فعلا جا شهر شتنبر اللي كنت من قبل كنكرهو حيت كان بداية الفراق مع العائلة ديالي بعدما كنت نمشي لتاوريرت باش أولا نقلّب على الكراء ومن بعد نقل الامتعة اللي نحتاج ليها.دابا تهنّينا من هاد المشاكل ولكن خاصني نمشي نشوف هاد المجموعة المدرسية باش مّا كان.
جا شهر شتنبر والصراحة داز علي شهر يوليوز شحال طويل خلافا للسنوات السابقة.المهم اليوم الأول منّو غادي المديرين يْوقعو محاضر الدخول في النيابة.اوى ما يمكنش ليا نتحرك .الغد ليه المديرين غادي يلتاحقو بالمدارس ديالهوم.اوى خوكم الحوميدي يمشي يزور هاد المجموعة ويتعرف على المدير ديالها ويمكن حتى الفرعية اللي غادي يخدم فيها.
الغد ليه بنتي عفاف بغات ترافقني..حيت حتى هي بغات تعرف مقر العمل ديالي الجديد.
اول حاجة مشينا لمحطة الطاكسيات .مين وصلنا لقينا شي طاكسيات تقريبا عامرين ولكن الوجهة ديالهوم ماشي ديالي والمشكل أنا ما عارفش تقريبا فين نمشي.جاب الله شي واحد ومن حسن الحظ معلم او عندو فالفاميلا شي حدْ فالتعليم أو قاري مزيان ، قال ليا مين قلت لو على الاسم ديال المجموعة المدرسية :
- خاصك تركب فالطاكسيات ديال سيدي بوهرية ولكن تنزل فلبصارة
بعدما شكرتو مشيت نقلب على هاد الطاكسي اللي تكلّم لي عليها المعلم او هاداك اللي عندو شي حد فالتعليم أو قاري مزيان (هههه).فعلا لقيت وحدة ما فيها حتى واحد .قرّبت من الشيفور اللي كان ناعس :
_ السلام عليكم
خونا بالله قفز ولكن غير شافني استبشر :
_ وعليكم السلام
ما خلّيتوش يتكلّم :
_ الله يخلّيك هاد الطاكسي تمشي لسيدي بوهرية
رد علي :
_ نعم سيدي ولكن راك انت اللّول ...مازال ما كاين حد
شفت في بنتي وقلت ليها : اوى يمكن غادي نستنّاو بزاف باش نركبو
مول الطاكسي هو اللي جاوبني :
_ آش نقول لك أسيدي ..داك الشي نهارات واليوم الثلاثاء قليل فيه الركوب فهاد الجهة على حقّاش الناس يمشيوْ لسوق النعيمة أو بركان.
المهم دازت تقريبا ساعة وما بان حتى واحد.
شي شوية قرّبت من الشيفور اللي عاود تاني قْفزْ من بلاصتو حيت كان ناعس
_ اسمح لي الشريف بشْحال لبلاصة ؟
_ 10 ديال الدراهم
شفت فالبنت ديالي وقلت ليها : غادي نخلّصْ كورصة .
سبحان الله العظيم : التاريخ يعيد نفسه.باقي عاقل أول يوم كان خاصني نمشي لعروبية اولاد سليمان اطلب منّي الشيفور ديال الطاكسي 100 درهم .
دابا خاصني نخلّص 60 درهم ولكن الحمد لله عندي الراتب ديالي وهادي قانونية .شفت فيه:
_ يا الله أخويا وصّلنا لسيدي بوهرية ولكن غادي نزلو غير فالطريق
_ ما كاين مشكل
خلّصناه وركبنا
الطاكسي شدّات الطريق ديال الغرب...يعني اتجاه فاس .بعدما قطعت 17 الكيلومتر تقريبا، كاين واحد ملتقى الطرق .الشيفور مشى مع الطريق الثانية وخوكم الحوميدي قْرى فلبلاكة : عين الصفاء - لبصارة - تافوغالت.
هاد الطريق واخا فيها الكودرون(goudron) يعني معبدة ضيقة شي شوية ولكن الميزة ديالها غاديا مستقيمة .كنت راكب حْدى الشيفور والبنت ديالي كانت مورايا .
شي شوية قلت للشيفور : مين تلحق واحد المدرسة الاسم ديالها مجموعة مدارس عبد الرحمان الداخل ، أوقفْ
شي شوية ، قال لي الشيفور :
_ ها المدرسة
هي هاديك انزلنا انا وبنتي وقرّبنا من المدرسة .تبان الصراحة قديمة والباب ديالها فديك لوقيتة فكّرني بالبيبان ديال المستوصفات القروية.ماشي بعيد هاد الباب راها تبرعات بيها وزارة الصحة لخوتنا المعلمين.أما العجيب فالمدرسة السور ديالها اللي ما يتعدّاش العلو ديالو متر.ربما هادي حاجة زينة : الى وصلنا شوية روطار وكان الباب مسدود اوى غير نقّز الحيط
من الصدف الجميلة كان الباب محلول ولكن يا الله فاش بغينا ندخلو ويجي لعندنا شي واحد صحيح.ماشي بعيد المدير .
خوكم فيه الأدب : اسمح لي سعادة المدير
شافْ فيا وضحك : بارك الله فيك أسيدي
تعجّبتْ :
_ ياكْ انت المدير ؟
_ آه يا خويا واش باينة عليا ؟
شي شوية قالت لي عفاف :
_ بّّا ها الادارة ويمكن المدير راه الداخل
خونا بالله قال لي : أنا الحارس ديال المدرسة .آش بغيتو ؟
جاوبتو :
_ أنا الاستاذ الجديد
خونا بالله فرح وقال لي : تبارك الله متشرفين أستاذ...
_ الأستاذ عبد الحميد
هي هاديك وصّلنا لعند المدير.
هاد المدير باين تقريبا فالعمر ديالي ، طويل وأنيق .الصراحة المديرين اللي كنت نعرف في تاوريرت الأغلبية ديالهوم غير بورزة.
_ السلام عليكم
_ وعليكم السلام ، تفضلو
دخلنا للإدارة وقدّمت لو نفسي :
_ الأستاذ عبد الحميد كنت نخدم في تاوريرت وراه جاني الانتقال ل م/م عبد الرحمان الداخل
_ مرحبا بيك عندنا .نتمنّى تلقى راحتك عندنا
جاوبتي : انا راحتي نلقى الجو المناسب ديال الخدمة
_ الله يعطيك الصحة وهادا هو المطلوب
بعدما عبّأت واحد المطبوع ، اعطاني السيد المدير واحد النبدة موجزة على المجموعة المدرسية وقال لي :
_ جوج أساتذة جداد تعينو هنا هاد العام انت واحد منهوم.الثاني راه معرّب وانت مزدوج.يعني انت يمكن ليك تْدرّس العربية والفرنسية
ردّيت عليه :
_ ما كاين مشكل .سبق لي خدمت فلعروبية ولكن هادي شحال وراني قرّيت الثالث والرابع والخامس عربية وفرنسية
_ تبارك الله وهادا فال زين ....بغيت نقول ما غاديش تلقى هنا شي مشكل
_ نتمنى سيدي المدير
المهم سوّلتو على الفرعية اللي غادي نخدم فيها أو هو يقول لي:
_ راها ما بعيداش بزاف ..يا الله هاديك 9 كيلومتر.
اندهشت : 9 كيلومتر !:!!! واش كاين شي مركوب ؟
المدير ضحك وقال لي : سّي عبد الحميد ياكْ ما يسْحاب ليك راك فلمدينة...هادي راها لعروبية
_ اوى ؟
_ ما تضرب هم ، كاين الاخوان معا من يمكن ادّير لانافيط (la navette)
_ الحمد لله
واحد لوقيتة ادخل واحد السيد .عرفت من بعد باللي هو حارس عام ديال الملحقة الاعدادية والمتواجدة داخل مركزية عبد الرحمان الداخل.زعما كاين الابتدائي والاعدادي.
بعد التعارف بيناتنا ودّعنا باش يمشي لوجدة.هي هاديك اقترح علينا باش نرافقوه حيت المركوب ما كاينش.
ودعنا المدير بعدما اخبرني بأن الدخول هو يوم 4 شتنبر وبعدما اعطاني الرقم ديال التيليفون باش نتّاصل بواحد الاستاذ عندو سيارة ويمكن نتّافق معاه بخصوص يوم توقيع المحضر
خلاصة القول هاد المجية كانت مفيدة : راني تعرفت على المدرسة وعرفت الفرعية اللي غادي نخدم فيها ودبّرت على راسي فالمركوب وفي الأخير راحنا راجعين لوجدة بيليكي ( فابور)
السيد الحارس العام كان يسكن في حي الديوانة وبالطبع جينا فالطريق ديالو وما احتاجيناش نركبو فالطوبيس باش نمشيو للدار.

انتهت الحلقة الأولى.أترككم في رعاية الله وحفظه وسنلتقي بإذن الله بعد يومين أي يوم الإثنين في نفس التوقيت.
ملاحظة مهمة : أريد منكم ارتسامات حول الحلقة الأولى فلا تبخلوا بها علي.