منتديات الأستاذ التعليمية التربوية المغربية : فريق واحد لتعليم رائد - عرض مشاركة واحدة

شكون يعطيني الشوار

شكون يعطيني الشوار شكون يفسر ليا؟
واش الدرويش حمار حيت عايش بالنية؟
واش المزلوط بيزار يشم نسمة نقية؟
واش الفقير عار يلقى حاجتو مقضية؟
شكون يعطيني الشوار شكون يفسر ليا؟

علاش نكون مسمار نعيش عيشة هنية؟
علاش نكون مخيار مرمي فركنة منسية؟
علاش ولى الشفار ينعم بالحرية؟
شكون يعطيني الشوار شكون يفسر ليا؟

علاش الكروش الكبار يزيدوهم في الترقية؟
والفقير يبقى يفقار وتقتلو الميزيرية
علاش مايكون الشفار فيه الإنسانية؟
يشفر بالمقدار ويخلي لينا شوية
شكون يعطيني الشوار شكون يفسر ليا؟

علاش الحب مرار ودخلاتو المادية؟
علاش الجمال سار بضاعة تجارية؟
علاش الصاحب غدار والصداقة وهمية؟
والجار ما بقى جار ملكاتو الأنانية
شكون يعطيني الشوار شكون يفسر ليا؟

علاش مولات الدار كانت عزيزة محضية؟
خرجت للعرى والتزيار متبعة الموضة الغربية
ورافعة الجسد شعار لإثبات الشخصية
فين الحيا والوقار فين المرا المغربية؟
شكون يعطيني الشوار شكون يفسر ليا؟

ياك الفن أفكار ورسالة إصلاحية
علاش ولى خطار بالإفساد والتبعية؟
والإعلام ولى ثرثار والعرى في الأغنية
شكون يعطيني الشوار شكون يفسر ليا؟

علاش عمري سار قصة اتراجيدية؟
علاش عزمي خار وتحطمات النفسية؟
علاش حلمي طار حمامة گمرية؟
علاش فكري احتار واليأس دار بيا؟
شكون يعطيني الشوار شكون يفسر ليا؟

علاش دوك الأشرار يقتلوا في البشرية؟
وأمة المليار ترضى بالذلية
ونشوفوا شي أشرار يهينو خير البرية
محمد المختار نفديه بعينية
شكون يعطيني الشوار شكون يفسر ليا؟