عرض مشاركة واحدة
قديم 2009-12-22, 23:30 رقم المشاركة : 1
أشرف كانسي
بروفســــــــور
 
الصورة الرمزية أشرف كانسي

 

إحصائية العضو








أشرف كانسي غير متواجد حالياً


وسام المشاركة

وسام الرتبة الأولى في مسابقة طاكسي المنتدى لشهر يو

وسام المرتبة الاولى لصناعة النجاح عن ورشة التفوق ه

وسام المراقب المتميز

الوسام الذهبي

مسرحية : الكنز المطمور


الكنز المطمور

مسرحية للفتيان


كتبها: محمود صبح

جميع الحقوق محفوظة
2002



المنظر : باحة خارج المدرسة , على اليمين كشك وفي الظهر سور المدرسة وعليه لافتات تؤشر الطريق المؤدية الى المرسة واخرى الى الحديقة .
(تنيثق من الراديو اغنية وحياة قلبي وافارحه لعبد الحليم ,العم امين داخل الكشك يرتب اغراضه يدخل فواد وسعيد . طلاب مدرسة انهوا الصف السادس)
فؤاد : عالعافي عمو امين
امين : اهلا يا هلا شباب بالمدرسة
سعيد : كل عام وانتي بخير عمو امين
امين : وانتو بخير يا حبايبي ....... تفضلوا تحلوا حلاوة اخر السنة.
سعيد : اما شو حفلة عملناها ..... قمنا الدنيا واقعدناها
امين : انشا الله ما كسرتوا طاولات وكراسي وشبابيك
فؤاد: لا عمو احنا احتفلنا ينهاية المرحلة الابتدائية ويوم السبت الجاي
طالعين عالمدرسة الاعدادية نتفرج ونتعرف.
سعيد: اه وراح يعطونا اسامي الكتب اللي راح نتعلم فيهن السنة الجاي.
امين : انشا الله يتتوفقوا
سعيد : هيك يا عمو امين .. يعني مش راح نشوفك.
امين: كيف مش راح تشفوني .. انا هون .. فاتح طول الوقت ... بعد.ين طريقكو
للاعدادية من هون كيف ما اطلعتوا وكيف ماتنزلوا كل يوم راح اشوفكو
اتصبح واتمس فيكو.
فؤاد: خوفي يا عمو انو احنا ننساك ونبطل نقدر نشوفك.
لازمة: مين بيقدر مين ينسى عمو امين

مين يصبح عليكو مين بطلع حواليكو
ويدعي يوفقوا الرحمن تتكونو شاطرين
*** لازمة***
من يدلكو عالطريق وملجاكو في وقت الضيق
ومثل اولادي عاملكو غير عمو امين
***لازمة***
مهما كبرتوا وابعدتوا تعلمتوا وادبتوا
انتو بضلوا بقلبي لو بتمر سنين

فؤاد: واحنا كمان مش ممكن ننساك يا عمو امين
سعيد: بهواك ... انا .... انا مش راح انساك ولا انسى عذابي معاك.
امين: الشقي بضلوا شقي ... ها يا شباب وين باقي الشلة؟
فؤاد: اشي روح عالبيت مقهور , اشي متنرفز , اشي مزّع الشهادة ........
سعيد: فريد ونوال راحوا عند سيدهم الي واعدهم بهدايا اذا اخذوا علامات امنيحة.
امين: وانتو كيف علاماتكو, انشاالله بيضتو وجهي.
سعيد: المضبوط... يعني...
فؤاد : فرجيه وما تستحيش
سعيد: انتي شو دخلك ... انا وعمو امين منصطفل.
امين: شو السيرة ... كنها مش ولا بد
سعيد: بس الرياضيات والانجليزية ...
فؤاد: قواعد العربي ...
سعيد: يعني انتي يالتاريخ والعلوم مضبط اكثر مني؟
امين: استنا انتي وياه ... اعطوني الشهادات اشوف.
سعيد فؤاد: عجبك !
( امين يأخذ ويقرأ في الشهادات)
امين: عال ... حلو ...... مش عاطل .... بس الانجليزية
سعيد: وحياة الله عمي امين انو تخلبطت في الامتحان وخلص الوقت والاستاذ مقبلش
يمددلي الوقت..
امين: يا ولدي لكل شي في وقت ... زي ما بيقولكوا دائما مش المهم العلامة ... المهم
انك تكون فاهم وعارف .
فؤاد : لكن اللي فاهم وعارف بيجيب علامة .
امين : هذا صحيح ..... انتو يا عمو جاين على مرحلة اصعب ... علشان هيك لازم
تشدوا حالكو شوي .... تدرسوا اكثر ... احسن من اللعب بالشارع وبالحارات.
فؤاد : عمو امين انني راح نبقى هون خلال الفرصة.....
امين: طبعا لكان وين بدي اروح ... بيجو الاولاد الحلوين يشتروا من عندي شوية
ملبس , بوظة , كازوز بنترزق شوي ... ومن ناحة ثانية بدير بالي عالجنينة بسقي الورد وبقص المرجة.
سعيد: عمو امين مسموح نلعب فوطبول بالجنينة.
امين: طبعا مسموح ... علشان هيك موجوده الجنينة والالعاب اللي فيها معمولة علشانكو .
فؤاد: بس ماحدا بيجي يلعب فيها . الكل عندو بسكليتات وبضلوا يكرجو عالشارع.
امين: هذا اللي قاهرني ومطيرلي مخي ... ولما بقول للشباب بلاش اللعب عالشارع بفكروني ما بحبهنش . بفكروني بحبش يلعبوا.
سعيد: عارف . هديك المرة بقولي انه عمو امين بدو ايا نلعب حدو علشان انضل نشتري من عندو.
امين: هيك لكان.
فؤاد: هدوك بفكرو ببطونهن مش بعقولهن.
( صوت بريك السيارة ... ضجيج سيارة اسعاف)
( فؤاد يخرج وبعد لحظات يتبعه سعيد)
امين: يا ساتر استر..... يالله سترك يا رب هدوك الاولاد جننوني مش عارف شو
العمل معهن علشان يبطلوا يلعبوا بالشارع ... وين راحوا هدول ... سعيد ....
فؤاد ... خبروني شو صار .
فؤاد : ( من الخارج) عمو امين . عمو امين
امين : مالك ها شو . مين انشا الله سليمه.
فؤاد: هاي . دنيا ... اندهكت.
امين: مين دنيا .
فؤاد: اخت عامر ابن صفي ... كانت تلعب بالطابة دحلت منها بنص الشارع
ركضت عشان تاوخذها اجا الشوفير معزق طيرها تحت الصور.
امين: شو صار فيها
سعيد: (يدخل) اخذوها المستشفى وبقولوا انها بحالة خطيرة.
امين: لا حول ولا قوة الا بالله .. خليكو هون اروح اتطمن عليها ...... يمكن الجماعة بحاجة لمساعدة.
سعيد: والله كل كلمة بحكيها عمو امين مضبوطة:
فؤاد: شو قصدك؟
سعيد: هاي دنيا عنيدة بتردش ... بتفكر الشارع الالها وبس . مش اول مرة بشوفها عمتلعب الطابة وبنص الشارع..........
فؤاد: اخوها عدنان ازنخ منها ... ضل يزن على ابوه تنو اشترالو بسكليت . نزل يلعب فيه بالحارة وصار يقطع قدام السيارات
سعيد: بيي ماكذبو هذا عدنان . قلنلوا هديك المرة هات شوط . بقولي هذا البسكليت مش الي هذا لاخوي ضرغام – واذا مسكتوا لحدا بقتلني
سعيد: مليح الي ما اخذتوا .., لانه هذا منحوس.
فؤاد: ليه ؟,... شو السيره...
سعيد: من يوم ما رجعت عليه سيارة ابو سليم .... العجل القدماني التوح ... والبريك بمسكش مليح. وهو ماحكش لابوه .... ولما كريم اين عمي مسكو منه اخذ شوط السيد عدنان اتهم كريم انه هو اللي لوحلوا العجل وخربلو اياه ... ويومها ولعت طوشة بين ابو عدنان وعمي ابو كريم.
فؤاد: يا اخي مليح الواحد ميلعبش بالشارع .... لكان وين تروح?.
امين : (يدخل) قلة ساحات في بهلبلد ... هاي ساحة المدرسة عاطلة ..... هاي الجنينة في ومي وعشب.
سعيد: صحيح والله يا عمو امين ... بس روح اقنع الاولاد .
امين: انا اسا جاي ومطنبري معاي .
فؤاد: يا ساتر
امين: يكفيش اللعب بالطابة والبسكليت ... مخترعين كمان لعبة جديدة .
فؤاد: لعبة يا بعيش يا بموت .
امين: انتو هيك بتسموها.
فؤاد: كمال ابن عمي قلي عنها , ما حبيتهاش
امين: اهلكوا بخلفوكو بربوكو وعلموكو وبصرفو دم قلبهن عليكو .. وانتو مستعدين بلحظة تتنازلو عن حياتكو برمشة عين الواحد فيكو ممكن يموت وفي الاخر ايش , لعبة , ايش الحق عالشوفير ...
فؤاد: ابوي راح م يدهك ولد هديك المره....
سعيد: عن جد ...
فؤاد: اه . كانوا عمبلعبوا . زمرلهن زاحوا . وما وصل حدهن قاموا دفشوا سالم اخوه لعارف . والولد مكيف يضحك ومبسوط . ولولا ابوي كان متنبه كان دعس . وقال ايش هاي بسموها لعبة
سعيد: يتعرف عمو امين . احنا لازم نفكر بطريقة كيف نمنع اللعب بالشارع.
فؤاد: نحط ارمات .
امين: ارمات محطوطة اي هو في حدا يرد عليها .
سعيد: نعمل ملاعب.
امين: عال مليح . بس اسا مفش ملاعب اللي بتحكي عنها . وتتنبني يمكن يوخذ اكثر من سنة.وبهذا الوقت ايش تعمل .
فؤاد: الاهل . كل واحد يدير باله عولاده.
امين: صحيح . هذا جزء من المشكلة انه الاهل لازم يتعاونوا وينبهوا على اولادهن.
سعيد: والمدرسة..
فؤاد : مهني دايما المعلمين ينبهوا علينا وفش حدا يرد .
امين: المعلمين الله يكون يعونهن .
سعيد: الاستاذ خالد هديك المره قال الي يرمي وسخ في الساحة او الصف بنزلوا علامات وكل يوم كان يعين عريف جديد . ما حدا عاد يسترجي يرمي وراق بالصف او بالساحة
فؤاد: لو بقولوا اللي يلعب بالشارع بنزلوا علامات .
سعيد: ومين بدو يكون عريف بالشارع.
امين: بوقت المدرسة , صحيح ...ممكن .... لكن بعد المدرسة والتعليم مين مستعد يوقف حارس .
فؤاد: اجاتني فكرة .
سعيد: يلا يا ابو الافكار
فؤاد: البوليس.
سعيد + امين: ماله !؟
فؤاد: يوقف واللي يلعب بالشارع يوخذوا مخالفة ...
سعيد: ياما اجا البوليس ويوقف بالحارة..لما بيجي البوليس الكل بخاف منه وبعمله حساب وما حدا يعود يلعب بالشارع . وبس يروح كله ينزل عالشارع .
امين: شغله بتحير . كيف بدنا نفهمهن.
كل واحد يبدا بنفسو
ويمشي حسب القانون
الاذى ما ييمسو
ومشواره يبقى مضمون

الرب العالى وصانا نحافظ ع حياتنا
احنا نبقى المسؤولين اذا كنا عشنا اومتنا
وكل واحد يبدا بنفسو ويتمشى حسب القانون

الازمة

الوصايا من عند الرب القانون بيسنو الشعب
للترتيب وللنظام المخالف يبقى ملعون
كل واحد يبدا بنفسو ويتمشى حسب القانون
الازمة
لو كل واحد ع كيفو يغني مواله وافو
الفوضى بتوكل الناس والعاقل يصبح مجنون
فكل واحد يبدا بنفسو ويتمشى حسب القانون
( يرن تلفون الدكان )
امين : خير اللهم اجعله خير ..... الو ... ايوا امين عمبيجكي مين معي ؟... وين ... اسا اسا ؟ .... طيب هياني بالطريق ..
سعيد : شو في عمو امين ؟
امين : ما في شي يا حبايبي ... هذا ابن اختي اتصل بقول انه جاي عندهم ضيوف وما في حدا في البيت غيره ... ابقو هون يا حبايبي ديروا بالكو على حالكو ...
فؤاد : بدك تسكر الدكان ؟..
امين : لا يا حبايبي ... ما انتو هون ... اذا حدا بدو شي انتو بتعرفو الاسعار .. ها ما بدي اوصيكو ...
سعيد : انتي تسهل .. واحنا مندير بالنا...
امين : فؤاد ... هات اعطيني بكيت بسكوت مسكّر خلينا نضيف الجماعة ...
فؤاد : اانت تامر ...
سعيد : عمو بدك نعمل شي ... نرتب الدكان وانتي مش هون ...
امين : ما بدي اغلبكو يا حبايبي ... انتي بس ديرو بالكو على حالكو ... واذا بدكو تلعبو ... بس بالجنينه او ساحة المدرسة ... مفهوم ..
سعيد : مفهوم ..
امين بخاطركو
سعيد + فؤاد : مع السلامة ..
سعيد : بيي .. نسيت اقولكو ...
فؤاد : مالك ..
سعيد : محسوبك عطشان وكنت بدي اشتري تروبيت ..
فؤاد : عامل حالك نسيت ... قول انه بدك تستغل الفرصة وتوخد اللي بدك اياه بدون ما تدفع ..
سعيد : عيب عليك ... انا بعمل هيك .. عمو امين مأمنا امانه ..
فؤاد : واسا شو بدك تعمل ؟
سعيد : بستنا تييجي ...
فؤاد : انا عندي الحل ..
سعيد : شو هو ؟
فؤاد : خد اللي بدك اياه وسجل على ورقة ولما بييجي عمو امين بتحاسبو ..
سعيد : والله فكره ..
صوت من الخارج : يا عمي امين ! عمي امين ... الك مكتوب ..
سعيد : عمي امين مش هون راح مشوار اسا بييجي ..
ساعي البريد : مطول تييجي ...
فؤاد : ابصر .. في عنده ضيوف ...
ساعي البريد : في الو مكتوب مسوغر ...
سعيد : هاتو وانا بعطيه اياه ..
ساعي البريد : عمبقولك مسوغر ... يعني هو لازم يستلمو بايدوا ويمضي انه استلمه....
فؤاد : معناه اقعد معنا بتسلينا وبستناه ...
ساعي البريد : ابن مين انتي ...
فؤاد : ابن خالد عمران ..
ساعي البريد : وانتي ..
سعيد : ابن صالح ياقوت ...
ساعي البريد : راح اسلمكو المكتوب .. بس هذا شكله مهم .. اليوم لازم يوصل لعمو امين ..
سعيد +فؤاد : ولا يهمك .. راح يوصل
" الساعي يسلمهم الرساله ويخرج "
سعيد : شكله من بلاد بره ..
فؤاد : بس عمو امين ما الو حدا براه البلاد ..
سعيد : بلكي صحابه ..
فؤاد : ابصر .. يمكن .. تعال نفتحو ..
سعيد : لا خيا ... هاي شغله خصوصية لعمو امين ممنوع تتدخل فيها .. وممنوع نفتح مكتوب مش النا .. انتي بتحب حدا يتدخل بخصوصياتك ..
فؤاد : طبعا لا ..
سعيد : هاي امانه ... والامانه غاليه
حافظ على الامانه الامانه غاليه
لا تفرط بغراض الناس تبقى خلاقك عاليه
الدنيا مليانه اسرار فيها الاخيار و الاشرار
لا تفضح اسرار الناس اسرارن عندن غاليه
لازمة
لسانك هو حصانك انتي ان صنته صانك
لازم تتمالك نفسك حتى لو ايدك طايله
لازمة
ال يتدخل في ال ما بعنيه بسمع كلام ما برضيه
كل صحابه بتركوه لو كان من اكبر جاليه
لازمة
اللي بأمن أمانه يمكن تكون حياته
اوعا تخون الامانه حتى لو كانت باليه

امين : "يدخل " هذا صحيح يا ولاد ... دايما الامانه غاليه
سعيد : عمو امين في معنا امانه للاك....
فؤاد : من ساعي البريد .. مكتوب مسوغر ..
امين : خير اللهم جعله خير
سعيد : ايش في عمو ...
فؤاد : ليكون ضريبه ..
امين : اللهم ابعدنا عن ولاد الحرام ..
امين " يفتح الرساله"
الى العم امين الامين ...
لقد علمنا بمشكلتكم ونحن نفكر معكم بايجاد الحل وبعد تفكير عميق وجدنا الحل ..
سعيد : حل ايش ..
فؤاد : استنا خلينا نسمع ..
امين : الحل موجود في الكنز ..
سعيد : كنز وين ؟
فؤاد : استنا ...
امين : الكنز موجود في حديقة الالعاب داخل اربعة صناديق .. في كل صندوق
رمز..:
بتتكون مع نفخة روح
فيها الساغ والمجروح
كل عايش عندو منها
ورثة من سفينة نوح
ملاحظة : الكنز كبير وكتير جدا بحيث يكفي لكل الاولاد اللذين يبحثون عنه
ويبقى منه للاجيال القادمة ..
سعيد : هذا يعني كل صندوق قد الدار...
فؤاد : واذا فتشو عنه ناس كتير كيف بدو يكفي كيف بدك تقسمو ..
امين : هذا اصعب لغز مر علّي بحياتي ..
سعيد : يقول انه في جنينه الالعاب ..
فؤاد : ويكفي لكل الناس ..
امين : خلوني افكر يا اولاد ..
سعيد : احسن شي ما تقول لحدا .. احنا منفتش عليه .. اكيد راح نلاقيه ..
فؤاد : وبس نلاقيه منعطيك اياه عمو وانتي بتقسمو علينا ..
امين : بلكي الكنز مش مصاري ..
فؤاد : يمكن ذهب ..
سعيد : او مجوهرات والماس ,,
امين : يا حبايبي في دايما اشي اغلى من الذهب والمجوهرات ..
فؤاد وسعيد : ايش هو ..
امين : الكنز .. احنا لازم ندور عليه ونلاقيه .. ولما نلاقيه راح نعرف ..
سعيد : احنا لازم نقول لحدا غيرنا ..
امين : طبعاً .. الرساله واضحة ..بقول انه راح يكفي لكل الاولاد اللي بفتشو عليه ...
يعني ما حدد عددهن .. هذا يعني .. لازم تخبر كل اولاد البلد ..
فؤاد : كيف ..
امين : انزلو على ساحة البلد وخبروا الاولاد الي بالحارات والشوارع ..
سعيد : انا خايف ..
امين : مين ايش ..
سعيد : احنا نقول للاولاد .. وبعدين بييجو اهاليهن وتضيع الطاسه
امين : تخافش الرساله واضحة ... مكتوب بالحرف الكبير " الاولاد " وانا راح افهم الاهل ..
فؤاد : كيف ؟
امين : اسا بتصل بالراديو المحلي بنخليهن يعملوا معاي مقابله بشرح فيها عن كل شي ..
سعيد : فكره بتجنن ..
امين : يلا يا اولاد .. انزلو عالحارة خبروا الاولاد خليهن ييجوا يدوروا عالكنز ..
سعيد وفؤاد يخرجان
امين : ( يرفع سماعة التلفون ويطلب رقم )
الو ... ايوا هادا انا ... شكرا الك الظاهر انه الشغله راح تضبط ... ايوا انا بعتهم يخبروا الاولاد ... قللي انت حضرت كل شي ... مش تعملي فضيحة ويطلع شغلنا عالفاضي .. لا لا .. لا تخاف علي .. طيب ابعتلي حدا من عندك يعمل معي مقابله بالراديو .. بسرعه لانه ما عاد في وقت ..
دور دوّر دور
يا دولاب دور
اعرف فتش دّور
عالكنز المطمور

كنوز الدنيا المخفيه يمكنلك تحت الطافية
تفرح لما يتلقاها وبقلبك بيعم النور

فتش عالكنز بايامك بيومك وباحلامك
والدنيا تبقى قدامك تفرشلك ورد زهور
السر مغطى بقشة عالملعب يلا مشي
دور عالكنز بتلاقاه لو اخر سبع بحور
الصحفي : السلام عليكم
امين : اهلا يا ابني تفضل
الصحفي : انا من راديو " العمر الطويل" ... جاي اعمل معاك مقابله ..
امين : اه طبعا اهلا يا ابني ..
الصحفي : عن شو بتحب تحكي ..
امين : عن الكنز ..
الصحفي : انو كنز .. وينو .. كنك ربحت باللوطو ..
امين : اكبر من هيك بكتير ..
الصحفي : وينه دللني عليه ..
امين : الكنز مش مصاري .. هو اغلى واعز من المصاري .. وما يتقدر في المال ..
الصحفي : انت قولي وينه واترك الباقي عليّ ..
امين : ميكرفونك شغال ؟...
الصحفي : اه طبعا .. الو .. الو واحد ثنين .. مستمعينا الكرام اهلا بكم من جديد ومعنا العم امين
ومعه خبر مهم .. تفضل عمو امين انتي عالهوا ..
امين : المظبوط اني اليوم استلمت رساله مهمة وفيها بشرى لكل ولاد البلد ..
الصحفي : بس ولاد بلدنا ؟ ... لانه عم بسمعونا كمان في بلاد تانيه ...
امين : لكل الاولاد اللي عمبسمعونا .. الرساله بتقول انه في عنا كنز كبير يكفي كل الاولاد ويبقى
منه كتير .. والكنز موجود في جنينه الالعاب ومطمور في اربع صناديق واللي بلاقيه اله جائزة كبيرة كنز كبير ..
الصحفي : سيداتي سادتي سمعتو شو قال عمو امين انا اول واحد تارك الصحافة والراديو ورايح
ادور عالكنز واخيرا راح اصير مليونير صدقت ام العنين احسن فتاحة بالبلد فتحتلي بفنجان القهوة وقالتلي انه راح الاقي كنز كبير .. الك احسن حلوان يا ست ام العنين ..
امين : استنا يا ولدي خد غراضك ..
الصحفي : خليلك اياهن .. انا رايح ادور على كنزي ..
امين : الله يسترنا من هوس الناس بالكنز وخايف على النعمه تنقلب نقمة ..
فؤاد : (يدخل) عمو امين سمعتك بالراديو ... اما شو ... ما وزعت الخبر بين لولاد ..ولا واحد
ضل بالحارة .. كله راح عالجنينه يدور عالكنز ..
امين : عال منيح ..
سعيد : الحقنا عمو امين ..
امين : شو السيرة مالك .. شو في ؟
سعيد : الجنينه مليانه ناس وكله عمبدور عالكنز ... ولاد كبار وصغار نسوان وبنات
فؤاد : لاحظت شغله غريبة في الجنينه ..
سعيد : شو هي ؟...
فؤاد : الزلام الكبار عمبدورو عالكنز الاولاد الصغار عمبلعبو عالالعاب .. شي عمبتمرجح , شي
عمبلعب بالطابه , شي عمبشد الحبل .. زي ما تقول حفلة عرس ..
امين : انشالله بضل عرس على طول والناس تيجي تقعد بالجنينه والاولاد يلعبو فيها , يعني
عالقليله ببطلوا يلعبوا بالشوارع وبيريحوني من المقارعة ..
فؤاد : بس بكرة لما يلاقوه الكنز بعاودو يرجعو زي ما كانوا ..
امين : يمكن اه ويمكن لآ ... شو يعرفك يمكن لما يلاقو الكنز راح يحبو الجنينه والملاعب ويتعلقوا
فيهن ..
سعيد : والله يا عمي امين مرات بفهم عليك مرات لآ .. انتي في وراك سر انا مش عارفهُ ..
امين : لا تشغل بالك يا ولدي .. شو مش ناويين تروحوا تدوروا عالكنز ... بلكي طالكو منو ايشي
سعيد : وانتي عمو ... بدك تيجي معنا ..
امين : انا يا ولدي هون بلكي اجا حدا يشتري من عندي , بلاقيني فاتح ومحضر حالي ..
سعيد : انا رايح الحق حالي ..
امين : وانتي يا فؤاد مش رايح ..
فؤاد : مش جاي على بالي .. الناس كتير وعجقة كبيرة , اكيد في حدا راح يزهق ويفل .. بعدين
مش انتي قلت انه مكتوب بالرساله راح يكفي لكل الاولاد
ويضل ..
ا مين : اه مظبوط ..
فؤاد : معناتو لايش اتعب حالي وادور وانا نصيبي راح يوصل لعندي ..
امين : اه ... انتي ولد حربوق ... المزبوط انا هاي ما فكرت فيها .. خليني اشوف المكتوب كمان
مره واقراه منيح احسن لاكون متخربط بشي ....... والكنز راح يكفي كل الاولاد اللي بدوروا .. فهمت ... اللي بدوروا .. مش اللي عمبستنوا نصيبهن .. يعني اللي ما بدور ما بوخد فهمت ..
فؤاد : فهمت .. يلا بخاطرك ..
(يدخل رجل بزي هندي)
الرجل : مرهبا ...
امين : اهلا وسهلا .. تفضل
الرجل : شكرا .. كنت بدي اسأل حضرتك وين الجنينه اللي فيها الالعاب ..
امين : هون لقدام شوي .. امبين على حضرتك انك غريب عالبلاد ... انت مش من عنا ..
الرجل : لآ ... انا جاي من بلاد الهند ... وصلت اخبار الكنز المكمور عندكو لبلادنا وانا جدي
المهراجا طابور ابن طاغور وصاني بالكنز هذا لانه ملك العيله ولازم الاقيه واحافظ عليه
امين : اها .. قلت المهراجا ... وينك يا ابو سليم تعال اسمع .... اخبار الكنز وصلت الهند ...
الرجل : مش هدا الكنز لازم يلاقوه الاولاد ..
امين : صحيح ..
الرجل : انا جبت معي كل اولاد العيله ... ولادي وولاد اخوتي وخياتي .. 21 ولد علشان ينتشروا
بالحديقة ويلاقوا الكنز ..
امين : طيب عمي .. تعال اشربك شي بارد وبعدين بندور على الكنز ..
الرجل : لا ... شكرا انا مستعجل ...
امين : طيب دربك من هون على ايدك الشمال وين بتشوف ناس عمبدوروا .. دوّر معهن ..
الرجل : شكرا ... سلامات ..
امين : (يرفع سماعة التلفون ) .. الو .. النجدة يا ابو سليم انجدني ... من الهند جايين يدوروا
عالكنز ... شو اعمل شو اسوي ... هاي الشغلة فاتتني وما خطرتعبالي ... اه ... اه .. عدة الصحفي بعدها عندي ... اه الزر الاحمر واكيد راح يسمعوني ... طيب بدك تجرب واحد ... واحد .. الو سامعني ... طيب .. ايش اعمل اعد للخمسة بالعكس شو يعني ... اه ... ابدا بالخمسة وانتهي بالواحد ..
اه .. فهمت .. مع السلامة على الله تزبط .. خمسة .. اربعة , تلاته اتنين واحد ... ايها المستمعين الكرام السلام عليكم ... بتكلم معكم العم امين بدنا نبه كل الناس اللي في حارتنا ما بتكفي لكل الناس ... يسرنا الاعلان انه في كل جنينه وفي كل ملعب من ملاعب الحارات والبلادفي كنز يعني كل واحد يدور عالكنز بحارته والى كل الوفود اللي اجت من برات البلاد بحب اقولكوا انه في كل دوله الها الكنز تبعها لانه وصلتنا رساله من صاحب الكنز الكبير بتقول انه في بلد في العالم وفي كل حارة وين في جنينه او ملعب للاولاد هناك في كنز ... والحاضر يعلم الغايب .....
(يعيد ويكرر صيغة البلاغ )
( يدخل شخص يلبس بالطو اسود , قبعه , نظارات ويتصرف متل الجواسيس )
الشخص : (يتكلم الى جهاز ارسال ) سي واحد حول سي واحد حول .. الوضع تحت السيطرة
وصلنا المكان وراح نباشر بالعمل , حوّل ..
(الشخص يقترب من امين )
الشخص : مين صاحب هاي الدكان ؟...
امين : العبد الواقف قبالك ..
الشخص : من هده اللحظه , الدكان مقفول ومشمع ممنوع البيع , ممنوع الشرا , المنطقة مسكرة ..
احنا المسؤولين عن المنطقة ..
امين : حبه .. حبه .. عمهلك .. انتو مين واحنا مين .. اللي يمد ايده عالدكانه ما يلوم الا حاله ...
الشخص : انت عارف مع مين عم تحكي ..
امين : ما حصليش الشرف !...
الشخص : ( يخرج بطاقة من جيبه ) انا من السي باي ميه
امين : اهلا وسهلا ... وهدا اللي بتحكي عنه .. مين وكيف وليش ..
الشخص : احنا المسؤولين عن كنوز الارض في العالم ممنوع اي حد يتصرف باي كنز من غير
مشورتنا ...
امين : وانتو شو عرفكو بالكنز ...
الشخص : ولو ... ما احنا السي باي ميه
امين : انتي بتعرف شي عن الكنز
الشخص : طبعا .. عنا كل المعلومات وعنا صور من الاقمار الاصطناعية بتحدد مكانه ..
امين : يعني بتعرف وين هو ...
الشخص : طبعاً ..
امين : طيب هات اعطيني علامة وينه اذا كنت صادق ..
الشخص : موجود تحت الارض ..
امين : اه
الشخص : لونه اسود ..
امين : اه
الشخص : هو على شكل سائل ...
امين : اها ...
الشخص : منه بتستخرج طاقة للسيارات , والطيرات , وزيوت ..
امين : انتي عم تحكي على الكنز ..
الشخص : طبعاً , احنا منعرف عنه كل شي ..
امين : اخونا الظاهر انك غلطان بالعنوان ..
الشخص : احنا مش ممكن نغلط ... كله مسجل ..
امين : لآ عمو انتو بتغلطو لما بتفكروا انه الدنيا الكو ... انه العالم ملكّو وانكو بتغدروا تسيطروا
على كنوز العالم .. اسمع لاقلك ارجع عند اللي بعتك وقوللو كنزنا لالنا وما حدا راح يوخده منا وكنزنا مش هو اللي انتو بدورو عليه متل كنزنا في كنوز كتير , كل بلد , كل حارة , كل دوله الها كنزها الخاص فيها وما حدا بغدر ولا مسموحله يوخد كنز حد تاني احمل شراشك والله معك ..
الشخص : انتي بتطردني ...
امين : بطردك انتي وكل اللي زيك , ما الكو شي عنا اتركونا بحالنا ..
الشخص : راح تندم ...
امين : كان غيرك اشطر ..
الشخص : طيب خلينا نتفاهم ... النص الكو والنص النا ...
امين : ما الكو شي عنا ... يلا تسهل ..وانا متأكد انه لو الكنز اللي عندكو غالي زي اللي عنا ...
كنتو ما جيتوا تدخلوا فينا وبدكو تسرقوا اللي النا ..
الشخص : انا رايح ... وقد اعذر من اعذر ..
امين : روح ....... تعطيك ...
سعيد : (من الخارج) عمو امين .. عمو امين ...
" يدخل وهو يحمل احد الصناديق "
امين : مالك ... شو مالك
سعيد : امسكتوا قبل ما ينهزم مع الصندوق
امين : برافو عليك ... بس مين هو
سعيد : واحد هندي ... جاي من ابصر وين بدو يوخد الكنز ... وشو جايب معه طون اولاد ... لقوا
هذا الصندوق وكانوا بدهن يوخدو ويروحو...
امين : وشو عملت ؟...
سعيد : قلت لحالي يا ولد .... هذا الكنز النا , لحارتنا ممنوع حد يوخدو ... رحت .....منه وجيت
اركاض ..
فؤاد : ( من الخارج ) وقف عندك اوعك تتحرك حط اللي بايدك واتصرف من هون
سعيد : هذا هون فؤاد ..
امين : فؤاد مالك يا عمي ..
فؤاد : (يدخل ومعه صندوق) تفضل شوف بكفيش جايين من بلاد غريبة ... قال
عمبسرقولنا كنزنا ... هذا النا ... لولاد حارتنا , واللي بمد ايده عليه يا ويله
امين : برافو عليكو يا شباب انا مبسوط منكو ولما بتعرفوا شو هو الكنز اكيد راح تبسطوا كتير ..
سعيد وفؤاد : ليش انتي بتعرف ..
امين : بخمن تخمين ..
سعيد : المهم باقي الصناديق
فؤاد : انا شفت سليم ابن جارنا حامل واحد وجايبه لهون ... موصلش
امين : لا لأسا ... بس اكيد راح يوصل ..
سعيد : بضل صندوق واحد ...
امين : يلا يا شباب لازم تلاقيه قبل ما تغيب الشمس وكل واحد يروح على بيته والا
منخسر الكنز ويروح تعبنا عالفاضي ..
فؤاد : انا رايح اشوف سليم ...
امين : وانا وياك بدنا ندور عالرابع .. لازم نلاقيه ..

( اغنية )...........
يا كنوز حارتنا محلاكي ما تحلا العيشة بلاكي
يحرسنا الرب العالي حرز الله اعطاني اياكي
اربع صناديق مخباية فيها الكنوز معباية
انتي قصتنا والحكاية يسلم لي تم الحاكي
الكنوز بقلب الملعب لمنلعب فيو تنتعب
وجنينة الفيها نتشقلب يسعد الله مساكي
يا كنوزنا ما اغلاكي سبحان ال اعطاني اياكي
مش ممكن اتخلى عنك اسا او لما القاكي

بتتكون من نفخة روح ورثة من سفينة نوح
ونسماتك الدوم تلوح بين ارضك وسماكي

نهاية






التوقيع




" أن تنتظر مجرد الثناء على فعلك التطوعي، فتلك بداية الحس الإنتهازي ''
محمد الحيحي

    رد مع اقتباس