نبيدا بسم الله اولا ديرت لعسل طريقة ديال واحد الاخت الله يجازيها بلخير 2كيلو سنيد+1 ليترو لما+اتاي+قرنفل نديرويهم رزيم صغيرة+نيص حامض كنديرو كولشي ف كوكوط و نيسدو عليه ش نيص ساعة ولا 45 دقيقة ندوزو دبا لمقادير د شباكية سراحة كتجي بنينا و هشيشة: زلفة زيت لعود + زلفة زبد+1بيض+ملعقة صغيرة خميرة العجين+زلفة لوز محمر و مطحون+زلفة زنجلان محمر و مطحون+نصف زلافة الخل+2 كوزات+1ونص خميرا حمرا+النافع+حبة حلوة+زلفة ماء زهر+قبصة ملح+الزعفران +زلفة دلماء+الدقيق ف الاخير العجينة تكون لينة لمهيم بالنسبة لحوايج لي نطحنوا ندوزوهم ف الغربال باش متقطع لينا العجينة انا جيبت ليكم الطريقة بالتفصيل الممل كنطلقوا العجينة و نقطعوا أشرطة: ونهزو شريط راس ديالو نلصقوه مزيان باش متحلش لينا ف زيت ونبداو ندورو بكل سهولة و فالأخير نلصقوا راس دشريط مزيان وهاهيا واجدة نقليوهوم ف زيت ملي يتحمرو شوي نرميوهم ديريكت ف لعسل و نديرو ليهم زنجلان هاهي الحمدلله شكل جميل و مداق رائع هادي الشباكية العادية حتا هيا نوريكم طريقة د تشباك ديالها هاهي الحمدلله والله اسأل ان يدخل علينا هذه الأشهر المباركة بمزيد من المغفرة